ഭുവനേശ്വര്‍: കേരളം രണ്ട് ഗോളിന് മുന്നിട്ടു നിന്ന ശേഷം 12 മിനിറ്റുകള്‍ക്കിടെ രണ്ട് ഗോളടിച്ച് ഗോവ തിരിച്ചുവന്നെങ്കിലും ഇഞ്ചുറി ടൈമില്‍ ഒ.എം ആസിഫിലൂടെ സന്തോഷ് ട്രോഫി ഫുട്‌ബോളിന്റെ ഫൈനല്‍ റൗണ്ടില്‍ കേരളം ആദ്യ ജയം സ്വന്തമാക്കി.

ആദ്യ പകുതിയില്‍ തന്നെ കേരളം മുന്നിലെത്തി. പൊനാല്‍റ്റിയിലൂടെ നിജോ ഗില്‍ബര്‍ട്ടാണ് സ്‌കോര്‍ ചെയ്തത്. രണ്ടാം പകുതിയുടെ തുടക്കത്തില്‍ റിസ്വാന്‍ അലിയിലൂടെ കേരളം ലീഡ് ഉയര്‍ത്തി. രണ്ടു ഗോളിന് പിന്നിട്ടു നിന്നതോടെ ഉണര്‍ന്നുകളിച്ച ഗോവ 12 മിനിറ്റുകള്‍ക്കിടെ രണ്ട് ഗോളുകള്‍ മടക്കി. മുഹമ്മദ് ഹഫീസ് ആണ് ഗോവയ്ക്കായി ഇരട്ടഗോള്‍ നേടിയത്. ആദ്യ ഗോള്‍ പൊനാല്‍റ്റിയിലൂടെയായിരുന്നു.

മല്‍സരം സമനിലയില്‍ അവസാനിക്കുമെന്ന് തോന്നിച്ച ഘട്ടത്തില്‍ പകരക്കരനായി ഇറങ്ങിയ ആസിഫ് അവസാന മിനിറ്റില്‍ നിര്‍ണായക ഗോള്‍ നേടുകയായിരുന്നു. ഫൈനല്‍ റൗണ്ട് പോരാട്ടത്തിലെ കേരളത്തിന്റെ ആദ്യ മത്സരമായിരുന്നു ഇത്. ഞായറാഴ്ച കര്‍ണാടകയ്‌ക്കെതിരെയാണ് ഗ്രൂപ്പ് എയിലെ കേരളത്തിന്റെ രണ്ടാം മത്സരം.