ബംഗളൂരു: ജെയ്ന്‍ സര്‍വകലാശാലയിലെ ജാതിയധിക്ഷേപ സ്‌കിറ്റ് എഴുതുകയും അവതരിപ്പിക്കുകയും ചെയ്ത ആറ് വിദ്യാര്‍ഥികളെ സസ്‌പെന്‍ഡ് ചെയ്തു. കോളജ് ഫെസ്റ്റിവലിന്റെ ഭാഗമായി നടത്തിയ സ്‌കിറ്റിലാണ് ജാതിയധിക്ഷേപ പരാമര്‍ശങ്ങളുണ്ടായത്.

ദളിത് അധിക്ഷേപം നടത്തിയതിനും ബി ആര്‍ അംബേദ്കര്‍ക്കെതിരെ അധിക്ഷേപ പരാമര്‍ശങ്ങള്‍ നടത്തിയതിനും നിരുപാധികം മാപ്പ് ചോദിക്കുന്നുവെന്ന് സര്‍വകലാശാല വ്യക്തമാക്കി. സംഭവം അന്വേഷിക്കാന്‍ അച്ചടക്ക സമിതിയെ ചുമതലപ്പെടുത്തിയെന്നും സര്‍വകലാശാല അറിയിച്ചു. ബംഗളൂരു ജയ്ന്‍ സര്‍വകലാശാലയിലെ മാനേജ്‌മെന്റ് വിദ്യാര്‍ഥികള്‍ക്കെതിരെയാണ് നടപടി. മാനേജ്‌മെന്റ് സ്റ്റഡീസ് വിദ്യാര്‍ഥികളുടേതായിരുന്നു സ്‌കിറ്റ്.

സ്‌കിറ്റിലെ വിവാദ പരാമര്‍ശങ്ങള്‍ ചില വിദ്യാര്‍ഥികള്‍ അധികൃതരെ ചൂണ്ടിക്കാട്ടിയിരുന്നെങ്കിലും നടപടിയുണ്ടായില്ലെന്നാണ് ആരോപണം. കോളജിലെ 'ഡെല്‍റോയ്‌സ് ബോയ്‌സ് ' എന്ന നാടക ഗ്രൂപ്പാണ് ആക്ഷേപഹാസ്യ സ്‌കിറ്റിന് പിന്നില്‍. ഒരു ദലിത് യുവാവ് സവര്‍ണ യുവതിയോട് പ്രണയാഭ്യര്‍ഥന നടത്തുന്നതും തുടര്‍ന്നുള്ള സംഭവവികാസങ്ങളുമാണ് സ്‌കിറ്റിന്റെ ഇതിവൃത്തം.