തിരുവനന്തപുരം: കേരളത്തിലെ സ്ഥിതി ഗൗരവതരമായി തുടരുന്നതിനിടെ രാജ്യത്തെ ഏറ്റവും കൂടുതല്‍ കൊവിഡ് ബാധിതരുള്ള ജില്ലയായി എറണാകുളം മാറി. ഇവിടെ അതിതീവ്ര വ്യാപനമാണ്. രണ്ടാം സ്ഥാനം ഡല്‍ഹിയാണെങ്കിലും മൂന്നാം സ്ഥാനത്തേക്കെത്തുന്നത് കോഴിക്കോടാണ്.
അതേ സമയം സംസ്ഥാനത്തുള്ള വാക്സീന്‍ ഡോസ് രണ്ട് ദിവസത്തില്‍ തീരുമെന്നും 50 ലക്ഷം വാക്സീന്‍ ഡോസ് എത്രയും വേഗം ലഭ്യമാക്കണമെന്നും മുഖ്യമന്ത്രി ഇന്നലെ ചൂണ്ടിക്കാട്ടിയിരുന്നു.

നിര്‍ദ്ദേശങ്ങള്‍ എല്ലാവരും കര്‍ശനമായി പാലിച്ചില്ലെങ്കില്‍ വീണ്ടും പ്രശ്‌നം ഗുരുതരമാകും. എറണാകുളത്തും കോഴിക്കോടും തിരുവനന്തപുരത്തും സ്ഥിതി ആശങ്കാജനകമാണ്. എല്ലായിടത്തും ആശുപത്രി കിടക്കകള്‍ നിറയുകയണ്. സംസ്ഥാനങ്ങള്‍ക്ക് സൗജന്യമായി വാക്സീന്‍ ലഭ്യമാക്കി ദേശീയ തലത്തില്‍ പ്രതിരോധം വികസിപ്പിക്കണമെന്നാണ് സംസ്ഥാനത്തിന്റെ നിലപാട്. 400 രൂപയ്ക്ക് വാക്സീന്‍ വാങ്ങാന്‍ 1300 കോടി രൂപ ചെലവാകും. ഇത് അധിക സാമ്പത്തിക ബാധ്യത അടിച്ചേല്‍പ്പിക്കും. ഇപ്പോള്‍ തന്നെ അടിയന്തര ചികിത്സ ലഭ്യമാക്കി ജീവന്‍ രക്ഷിക്കാന്‍ സംസ്ഥാനത്തിന് വലിയ തോതില്‍ പണം ചെലവാക്കേണ്ടി വരുന്നുണ്ടെന്നും മുഖ്യമന്ത്രി വ്യക്തമാക്കിയിരുന്നു. ഇതെല്ലാം സ്ഥിതി ഗുരുതരമാക്കുന്നുവെന്നതിന്റെ ആശങ്കകളാണ്.

എല്ലായിടത്തും തിരക്കില്ലാതിരിക്കാന്‍ മുന്‍കരുതല്‍ സര്‍ക്കാര്‍ സ്വീകരിച്ചിട്ടുണ്ട്. കടകളില്‍ എത്തുന്നവരുടെ പേരും മറ്റ് വിവരങ്ങളും എഴുതി സൂക്ഷിക്കണം. സെക്ടറല്‍ മജിസ്ട്രേറ്റുമാര്‍ ഇക്കാര്യം ഉറപ്പാക്കും. കൊവിഡ് പോസിറ്റീവായ വിവരം മറച്ചുവെച്ച് സമൂഹത്തില്‍ ഇടപെടല്‍ നടത്തുന്നത് അപകടം ക്ഷണിച്ചുവരുത്തും.