കോപ്പിയടിച്ചു പിടിച്ചാൽ ഡിബാർ ചെയ്യില്ല, ഇന്റേണൽ മാർക്ക് അനുപാതത്തിലും മാറ്റം
സ്വന്തം ലേഖകൻ
കോഴിക്കോട്
സംസ്ഥാനത്തെ സർവകലാശാല പരീക്ഷകളിൽ അടുത്ത അധ്യയന വർഷം മുതൽ സമഗ്രമായ മാറ്റങ്ങൾ വരുന്നു. സർവകലാശാല പരീക്ഷാ നടത്തിപ്പുമായി ബന്ധപ്പെട്ട പരിഷ്‌കരണങ്ങൾക്കായി സംസ്ഥാന സർക്കാർ നിയോഗിച്ച കമ്മിഷണർ നൽകിയതാണ് ശുപാർശ.
പരീക്ഷാ നടത്തിപ്പിലും മൂല്യനിർണയത്തിലും സമഗ്ര അഴിച്ചുപണിക്ക് കമ്മിറ്റി ശുപാർശ ചെയ്യുന്ന ഇടക്കാല ഉത്തരവാണ് സർക്കാരിന് സമർപ്പിച്ചത്.
എം.ജി സർവകലാശാല പ്രൊവൈസ് ചാൻസലർ ഡോ.സി.ടി അരവിന്ദകുമാർ അധ്യക്ഷനായ കമ്മിഷനാണ് ശുപാർശ നൽകിയത്. കേരള സർവകലാശാല രജിസ്ട്രാർ ഡോ.കെ.എസ് അനിൽ കുമാർ, സാങ്കേതിക സർവകലാശാല രജിസ്ട്രാർ ഡോ.എ പ്രവീൺ, കാലിക്കറ്റ് സർവകലാശാല മുൻ രജിസ്ട്രാർ ഡോ.സി.എൽ ജോഷി എന്നിവരാണ് കമ്മിഷനിലെ മറ്റു അംഗങ്ങൾ.
ബിരുദ ബിരുദാനന്തര കോഴ്‌സുകളുടെ സെമസ്റ്റർ പരീക്ഷകളിൽ ഒന്ന്, മൂന്ന് സെമസ്റ്റർ പരീക്ഷകൾ കോളജുകൾക്ക് കൈമാറണമെന്നതാണ് പ്രധാന നിർദേശം.
കോപ്പിയടി പിടികൂടിയാൽ പുതിയ പേപ്പർ നൽകി വിദ്യാർഥിയെ പരീക്ഷ പൂർത്തിയാക്കാൻ അനുവദിക്കണമെന്നും കുറ്റക്കാരെന്ന് കണ്ടെത്തിയാൽ നടപടി ബന്ധപ്പെട്ട പരീക്ഷയിൽ മാത്രമായിരിക്കണമെന്നും നിർദേശമുണ്ട്. ഇതോടെ നേരത്തെയുണ്ടായിരുന്ന മൂന്നു വർഷത്തെ ഡീബാറിങ് സമ്പ്രദായം ഒഴിവാകും.
പരീക്ഷയിലെ കൃത്രിമം പിടികൂടിയാൽ അതേദിവസം തന്നെ റിപ്പോർട്ട് ചെയ്യണമെന്നും പരീക്ഷാ ഹാളിൽ ഉൾപ്പെടെ ഡിജിറ്റൽ നിരീക്ഷണ സംവിധാനം ഏർപ്പെടുത്താനും കമ്മിഷൻ നിർദേശമുണ്ട്.