ഗസ്സ: ഗസ്സയിലേക്കുള്ള സഹായങ്ങള്‍ തടയുകയും ആക്രമണം തുടരുകയും ചെയ്യുന്ന ഇസ്‌റാഈല്‍ ഭരണകൂടത്തിന്റെ ചെയ്തിയെ യുദ്ധക്കുറ്റമായി കണക്കാക്കേണ്ടിവരുമെന്ന് യു.എന്‍.

ഗസ്സയിലെ പട്ടിണിയും ക്ഷാമവും ഇസ്‌റാഈല്‍ ഭക്ഷ്യവസ്തുക്കളും മറ്റ് സഹായങ്ങളും തടഞ്ഞ് കടുത്ത നിയന്ത്രണം ഏര്‍പ്പെടുത്തിയത് മൂലമുണ്ടായതാണ്. ജനങ്ങള്‍ ഭവനരഹിതരാക്കപ്പെടുകയും അടിസ്ഥാന സൗകര്യങ്ങളെല്ലാം തകര്‍ക്കപ്പെടുകയും ചെയ്തിരിക്കുന്നു യു.എന്‍ മനുഷ്യാവകാശ വിഭാഗം മേധാവി വോള്‍കര്‍ ടര്‍ക് ചൂണ്ടിക്കാട്ടി. അതേസമയം, പട്ടിണിയെ ഇസ്‌റാഈല്‍ ആയുധമാക്കിയോ എന്നതു സംബന്ധിച്ച് അന്തിമ തീരുമാനമെടുക്കേണ്ടത് കോടതിയാണെന്ന് വോള്‍കറുടെ വക്താവ് ജെറമി ലോറന്‍സ് വിശദീകരിച്ചു.

ഇസ്‌റാഈലി ആക്രമണം മൂലം ഗസ്സയിലെ പകുതിയിലേറെ ജനങ്ങളും പട്ടിണി നേരിടുകയാണെന്ന് യു.എന്നിന് കീഴിലെ ഭക്ഷ്യ സുരക്ഷാ വിഭാഗം മുന്നറിയിപ്പ് നല്‍കിയിരുന്നു. ഭക്ഷ്യവസ്തുക്കളെത്തിച്ചില്ലെങ്കില്‍ പ്രതിദിനം 200ലേറെ പേര്‍ പട്ടിണിയെ തുടര്‍ന്ന് മരിച്ചുവീഴുമെന്ന് യു.എന്‍ മാനവികകാര്യ ഏജന്‍സി വക്താവ് ജെന്‍സ് ലാര്‍കെ വ്യക്തമാക്കി.