സ്വന്തം ലേഖകൻ
കോഴിക്കോട്
സിൽവർലൈനിനെതിരേ യു.ഡി.എഫ് നേതൃത്വത്തിൽ നാല് മേഖലകളിലായി ജാഥകൾ സംഘടിപ്പിക്കുന്നു. 16 മുതൽ 19 വരെ നടക്കുന്ന ജാഥയിൽ യു.ഡി.എഫ് നേതാക്കൾ നേതൃത്വം നൽകും.
കോഴിക്കോട്, കണ്ണൂർ, വയനാട്, കാസർകോട് ജില്ലകൾ ഉൾകൊള്ളുന്ന മേഖലാ ജാഥ എം.കെ മുനീർ എം.എൽ.എ നയിക്കും. ടി.സിദ്ധീഖ് എം.എൽ.എ, ഫോർവേഡ് ബ്ലോക്ക് ദേശീയ സെക്രട്ടറി ജി.ദേവരാജൻ എന്നിവർ ജാഥാ ഉപനായകരായി പങ്കെടുക്കും. കാസർകോടുനിന്ന് ആരംഭിക്കുന്ന ജാഥ 19 ന് കോഴിക്കോട് മുതലക്കുളത്ത് സമാപിക്കും.
എറണാകുളം, തൃശൂർ, പാലക്കാട്, മലപ്പുറം ജില്ലകൾ ഉൾക്കൊള്ളുന്ന മേഖലാ ജാഥയ്ക്ക് കൊടിക്കുന്നിൽ സുരേഷ് എം.പി നേതൃത്വം നൽകും. അനൂപ് ജേക്കബ് എം.എൽ.എ, കെ.പി.സി.സി വൈസ് പ്രസിഡന്റ് വി.ടി ബൽറാം എന്നിവർ ഉപനായകർ. പിറവത്തുനിന്ന് ആരംഭിക്കുന്ന ജാഥ മലപ്പുറത്ത് സമാപിക്കും.കോട്ടയം, പത്തനംതിട്ട, ഇടുക്കി ജില്ലകൾ ഉൾക്കൊള്ളുന്ന മേഖലാ ജാഥയുടെ നായകൻ മോൻസ് ജോസഫ് എം.എൽ.എയും ഉപനായകർ എം.എൽ.എമാരായ മാണി സി.കാപ്പൻ, പി.സി വിഷ്ണുനാഥ് എന്നിവരുമാണ്. തൊടുപുഴയിൽനിന്ന് ആരംഭിക്കുന്ന ജാഥ കോട്ടയത്ത് സമാപിക്കും.
തിരുവനന്തപുരം, ആലപ്പുഴ, കൊല്ലം ജില്ലകൾ ഉൾപ്പെടുന്ന മേഖലാ ജാഥയുടെ കാപ്റ്റൻ എൻ.കെ പ്രേമചന്ദ്രൻ എം.പിയാണ്. എം.വിൻസെന്റ് എം.എൽ.എയും സി.എം.പി നേതാവ് എം.പി സാജുവും ഉപനായകർ. തിരുവനന്തപുരം ഗാന്ധി പാർക്കിൽനിന്ന് ആരംഭിക്കുന്ന ജാഥ 19 ന് ആലപ്പുഴയിൽ സമാപിക്കും.ജാഥയ്ക്കു ശേഷം എല്ലാ ജില്ലകളിലും സിൽവർലൈൻ ആശങ്കകളുമായി ബന്ധപ്പെട്ട് തുറന്ന സംവാദം സംഘടിപ്പിക്കും. സംസ്ഥാന സർക്കാരിന്റെ ഒന്നാം വാർഷികമായ മെയ് 20 ന് പഞ്ചായത്ത് കേന്ദ്രങ്ങളിൽ വൈകീട്ട് സായാഹ്ന ധർണ സംഘടിപ്പിക്കും. ഓഗസ്റ്റ് 15 ന് സ്വാതന്ത്ര്യദിനത്തിൽ സിൽവർലൈൻ കടന്നു പോകുന്നയിടങ്ങളിലൂടെ യു.ഡി.എഫ് നേതൃത്വത്തിൽ മനുഷ്യച്ചങ്ങലയും സംഘടിപ്പിക്കും. ജാഥയുടെ ആലോചനാ യോഗത്തിൽ പ്രതിപക്ഷ നേതാവ് വി.ഡി സതീശൻ അധ്യക്ഷനായി. യു.ഡി.എഫ് കൺവീനർ എം.എം ഹസൻ, മുസ്‌ലിം ലീഗ് സംസ്ഥാന ജനറൽ സെക്രട്ടറി ഇൻ ചാർജ്ജ് പി.എം.എ സലാം, എം.കെ മുനീർ, ടി.സിദ്ദീഖ് എം.എൽ.എ പങ്കെടുത്തു.