പാലക്കാട്: സിഗ്നലില്‍ നിര്‍ത്തിയിട്ട ലോറി മുന്നോട്ടെടുക്കവേ ലോറിക്കടിയിലേക്ക് ചാടി മധ്യവയസ്‌കന്‍ ആത്മഹത്യ ചെയ്തു. പാലക്കാട് കൊപ്പം സ്വദേശി സുകുമാരനാണ് മരിച്ചത്. ഇന്ന് ഉച്ചയ്ക്ക് രണ്ടുമണിയോടെ മേലെ പട്ടാമ്പിയിലെ ട്രാഫിക് സിഗ്‌നലിലായിരുന്നു സംഭവം.

ലോറി ട്രാഫിക് സിഗ്‌നലില്‍ നിര്‍ത്തിയിട്ട സമയത്താണ് സുകുമാരന്‍ വാഹനത്തിന് സമീപമെത്തിയത്. ലോറി മുന്നോട്ടെടുക്കാന്‍ തുടങ്ങിയതോടെ ഇയാള്‍ ലോറിക്കടിയില്‍, മധ്യഭാഗത്തേക്ക് ചാടുകയും പിന്‍ചക്രങ്ങള്‍ ഇയാളുടെ ശരീരത്തിലൂടെ കയറിയിറങ്ങുകയുമായിരുന്നു. തല്‍ക്ഷണം മരണം സംഭവിച്ചെന്നാണ് വിവരം.

ആത്മഹത്യയാണെന്നാണ് പട്ടാമ്പി പൊലിസിന്റെ പ്രാഥമിക നിഗമനം. സംഭവത്തില്‍ പൊലീസ് അന്വേഷണം ആരംഭിച്ചിട്ടുണ്ട്. മറ്റ് സാധ്യതകളും പൊലിസ് പരിശോധിക്കുന്നുണ്ട്. മൃതദേഹം പട്ടാമ്പി താലൂക്ക് ആശുപത്രിയിലേക്ക് മാറ്റി.