തിരുവനന്തപുരം: സംസ്ഥാനത്ത് ടൗട്ടേ ചുഴലിക്കാറ്റിന്റെ പ്രഭാവം കുറഞ്ഞെങ്കിലും പല ജില്ലകളിലും മഴ തുടരുന്നു.

എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ കേന്ദ്ര കാലാവസ്ഥാ വകുപ്പ് ഓറഞ്ച് അലര്‍ട്ട് പ്രഖ്യാപിച്ചു. ഇവിങ്ങളില്‍ ശക്തമോ അതിശക്തമോ ആയ മഴയ്ക്ക് സാധ്യയുണ്ട്.

മേയ് 16 മുതല്‍ മേയ് 19 വരെ കേരളത്തില്‍ ഒറ്റപ്പെട്ടയിടങ്ങളില്‍ 30-40 കിലോ മീറ്റര്‍ വരെ വേഗതയില്‍ വീശിയടിച്ചേക്കാവുന്നകാറ്റിനും ഇടിമിന്നലോട് കൂടിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

തിരുവനന്തപുരത്ത് ഇടവിട്ടുള്ള ശക്തമായ മഴയും കാറ്റും കടല്‍ക്ഷോഭവും തുടരുകയാണ്.
തകര്‍ന്ന ശംഖുമുഖം - എയര്‍പോര്‍ട്ട് റോഡില്‍ യാത്രാവിലക്ക് ഏര്‍പ്പെടുത്തി. കോഴിക്കോട് വടകര, അഴിത്തല, കുരിയാട് മേഖലകളില്‍ കടലാക്രമണത്തില്‍ വന്‍നാശനഷ്ടം ഉണ്ടായി.നൂറോളം വീടുകള്‍ ഭാഗികമായി തകര്‍ന്നു. കടലാക്രമണത്തില്‍ നാല് കിലോമീറ്റര്‍ നീളത്തിലുള്ള കടല്‍ഭിത്തി തകര്‍ന്നു.

കാസര്‍കോട് ജില്ലയില്‍ കനത്ത മഴയും കാറ്റും തുടരുമെന്ന് കാലാസ്ഥ കേന്ദ്രം അറിയിച്ചിട്ടുണ്ട്. കണ്ണൂര്‍ പഴശി ഡാമിന്റെ ഷട്ടറുകള്‍ ഭാഗികമായി തുറന്നു.