ചേരാപുരം: വേളം പുത്തലത്തെ യൂത്ത്‌ലീഗ് പ്രവര്‍ത്തകനായിരുന്ന പുളിഞ്ഞോളി നസീറുദ്ദീന്‍ വധിക്കപ്പെട്ട കേസില്‍ മൂന്നു പ്രതികള്‍ക്കെതിരേ ലുക്ക്ഔട്ട് നോട്ടീസ് പുറപ്പെടുവിച്ചു. പൂളക്കൂല്‍ ചെറിയ കുന്ന്യേലത്ത് മുഹമ്മദ്, വലകെട്ട് ചമ്പേങ്കോട്ടുമ്മല്‍ സാദിഖ്, പൂളക്കൂല്‍ രയരോത്ത്കുനി സാബിത്ത് എന്നിവര്‍ക്കെതിരേയാണ് ലുക്ക്ഔട്ട് നോട്ടീസ്. പ്രതികളെ രക്ഷപ്പെടാനും തെളിവുനശിപ്പിക്കാനും സഹായിച്ചതാണ് ഇവര്‍ക്കെതിരേയുള്ള കുറ്റം. ഇവരില്‍ ചിലര്‍ വിദേശത്തേക്കു കടന്നതായി സംശയിക്കുന്നു.
കൊലപാതകത്തില്‍ നേരിട്ടു പങ്കെടുത്ത കുപ്പച്ചേരി ബഷീര്‍, കൊല്ലിയില്‍ അന്ത്രു എന്നിവരെ കൃത്യം നടന്നു പിറ്റേദിവസം തന്നെ പൊലിസ് അറസ്റ്റ് ചെയ്തിരുന്നു. പിന്നീട് മറ്റു പ്രതികളായ നടുപുത്തലത്ത് റഫീഖ്, ഒറ്റത്തെങ്ങുള്ളതില്‍ റഫീഖ് എന്നിവരെയും അറസ്റ്റ് ചെയ്തു. എല്ലാവരും റിമാന്‍ഡിലാണ്. ജൂലൈ 15നു രാത്രിയാണ് നസീറുദ്ദീന്‍ കൊല്ലപ്പെട്ടത്.
പിതൃസഹോദരപുത്രന്‍ റഊഫുമൊന്നിച്ച് ബൈക്കില്‍ വരുമ്പോള്‍ എതിരേ മറ്റൊരു ബൈക്കില്‍വന്ന അക്രമികള്‍ ബൈക്ക് തടഞ്ഞുനിര്‍ത്തി നസീറുദ്ദീനെ കുത്തിക്കൊലപ്പെടുത്തുകയായിരുന്നു.