85 ശതമാനം സീറ്റുകള്‍ സര്‍ക്കാരിന് വിട്ടുകൊടുക്കും
തിരുവനന്തപുരം: സ്വാശ്രയ ദന്തല്‍ കോളജ് പ്രവേശനത്തില്‍ സംസ്ഥാന സര്‍ക്കാരും സ്വാശ്രയ കോളജ് മാനേജ്‌മെന്റുകളും തമ്മില്‍ ധാരണയായി. മാനേജ്‌മെന്റുകള്‍ 85 ശതമാനം സീറ്റുകള്‍ സര്‍ക്കാരിന് വിട്ടുകൊടുക്കും. ഏകീകൃത ഫീസായി നാലു ലക്ഷം രൂപയാകും ഈടാക്കുക. എന്നാല്‍, ഇതോടെ മെറിറ്റ് സീറ്റില്‍ കുറഞ്ഞ ഫീസില്‍ പഠിക്കാനുള്ള അവസരം വിദ്യാര്‍ഥികള്‍ക്ക് നഷ്ടമാകുമെന്നാണ് വിലയിരുത്തപ്പെടുന്നത്.
85 ശതമാനം സീറ്റുകളും മാനേജ്‌മെന്റുകള്‍ സര്‍ക്കാരിന് വിട്ടുകൊടുക്കുന്നത് കേന്ദ്ര ആരോഗ്യമന്ത്രാലയത്തിന്റെ നിര്‍ദേശമനുസരിച്ചാണ്. ഇതിനുപകരമായി ഏകീകൃത ഫീസെന്ന മാനേജ്‌മെന്റുകളുടെ ആവശ്യം സര്‍ക്കാര്‍ അംഗീകരിച്ചു. സര്‍ക്കാരിന് വിട്ടുകൊടുക്കുന്ന 85 ശതമാനം സീറ്റുകളിലും പ്രതിവര്‍ഷം നാല് ലക്ഷം രൂപ വീതം ഫീസ് ഈടാക്കാനാണ് ധാരണ.
മുന്‍ വര്‍ഷങ്ങളില്‍ മെറിറ്റ് സീറ്റില്‍ നാലുതരം ഫീസ് ഘടനയായിരുന്നു. 23,000,  44,000, ഒന്നേകാല്‍ ലക്ഷം, ഒന്നേ മുക്കാല്‍ ലക്ഷം എന്നിങ്ങനെയായിരുന്നു ഫീസ്. മാനേജ്‌മെന്റ് സീറ്റില്‍ ഫീസ് നാലേമുക്കാല്‍ ലക്ഷമായിരുന്നു.
എം.ബി.ബി.എസ് കോഴ്‌സിലും ഏകീകൃത ഫീസെന്ന ആവശ്യത്തിന്‍മേല്‍ സര്‍ക്കാരും മെഡിക്കല്‍ കോളജ് മാനേജ്‌മെന്റുകളും തമ്മിലുള്ള ചര്‍ച്ച പരാജയപ്പെട്ടു. എന്നാല്‍  85 ശതമാനം സീറ്റുകളിലേയും പ്രവേശനാധികാരം സര്‍ക്കാരിന് വിട്ടുനല്‍കുന്നത് തങ്ങള്‍ക്ക് തിരിച്ചടിയാകുമെന്ന വാദമാണ് മാനേജ്‌മെന്റുകള്‍ ഉയര്‍ത്തുന്നത്.