ദുബൈ: അബൂദബി ഖാലിദിയയിലെ മലയാളി റെസ്റ്റോറന്റില്‍ ഗ്യാസ് സിലിണ്ടര്‍ പൊട്ടിത്തെറിച്ച് രണ്ടുപേര്‍ മരിച്ചു. 120 പേര്‍ക്ക് പരിക്കേറ്റു. അബൂദബി പൊലിസാണ് വിവരം അറിയിച്ചത്. സെന്‍ട്രല്‍ അബൂദബിയിലാണ് ഗ്യാസ് സ്‌ഫോടനം ഉണ്ടായത്. ഖാലിദിയയിലെ ഫുഡ് കെയര്‍ റെസ്റ്റോറന്റില്‍ ഇന്ന് ഉച്ചയ്ക്ക് ഒരുമണിക്ക് ശേഷമാണ് സംഭവം. മരിച്ചവരെകുറിച്ചുള്ള വിവരങ്ങള്‍ ഇതുവരേ പൊലിസ് പുറത്തുവിട്ടിട്ടില്ല
സമീപവാസികള്‍ ഒരു ശബ്ദം കേട്ടു. അവരുടെ ജനാലകള്‍ കുലുങ്ങുകയും ചെയ്തതായി റിപ്പോര്‍ട്ടുണ്ട്. പ്രദേശത്ത് നിന്ന് പുക ഉയരുന്നത് കാണാമായിരുന്നു. ഷൈനിംഗ് ടവേഴ്‌സ് സമുച്ചയത്തിന് സമീപമുള്ള നിരവധി റോഡുകളില്‍ പൊലിസ് ബന്ധവസ് ഏര്‍പ്പെടുത്തിയിരുന്നു.
ഒരു റെസ്റ്റോറന്റിന് മുന്നില്‍ പാര്‍ക്ക് ചെയ്തിരുന്ന വാഹനങ്ങള്‍ അവശിഷ്ടങ്ങള്‍ കൊണ്ട് മൂടിയതായി ചിത്രങ്ങളില്‍ കാണാം. സ്‌ഫോടനത്തില്‍ നിരവധി പേര്‍ക്ക് പരുക്കേറ്റതായും നിരവധി കടകള്‍ക്ക് കേടുപാടുകള്‍ സംഭവിച്ചതായും പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നു. കുടുതല്‍ വിവരങ്ങള്‍ ഔദ്യോഗികമായി പുറത്തുവരേണ്ടതുണ്ട്.