ഇന്‍ഡോര്‍: ക്ഷേത്രക്കിണര്‍ തകര്‍ന്നുണ്ടായ അപകടത്തില്‍ 36 പേര്‍ മരിച്ച സംഭവത്തിന് പിന്നാലെ ക്ഷേത്രത്തിലെ അനധികൃത കെട്ടിടങ്ങള്‍ പൊളിച്ചുനീക്കാന്‍ ബുള്‍ഡോസറുമായെത്തി മുന്‍സിപ്പല്‍ കോര്‍പറേഷന്‍ അധികൃതര്‍. അഞ്ചിലധികം ബുള്‍ഡോസറുകളാണ് ക്ഷേത്രത്തിലെത്തിയത്.

ക്രമസമാധാന സുരക്ഷയ്ക്ക് നാല് സ്‌റ്റേഷനുകളിലെ പൊലിസുകാരെയാണ് വിന്യസിച്ചിരിക്കുന്നത്. ഡെപ്യുട്ടി മുനിസിപ്പല്‍ കമ്മീഷണര്‍, ജില്ലാ മജിസ്‌ട്രേറ്റ്, മറ്റ് ഉദ്യോഗസ്ഥരും സ്ഥലത്തുണ്ട്. തകര്‍ന്നുവീണത് അനധികൃത നിര്‍മ്മിതിയാണെന്നും അവ പൊളിച്ചുനീക്കാന്‍ മുനിസിപ്പല്‍ കോര്‍പറേഷന്‍ കഴിഞ്ഞ വര്‍ഷം നോട്ടിസ് നല്‍കിയിരുന്നതാണെന്നും അന്വേഷണത്തില്‍ കണ്ടെത്തിയിരുന്നു. പ്രദേശവാസികളില്‍ നിന്നും കോര്‍പറേഷന് പരാതിയും ലഭിച്ചിരുന്നു.

ഇന്‍ഡോറിലെ ബലേശ്വര്‍ മഹാദേവ ക്ഷേത്രത്തില്‍ രാമനവമി ആഘോഷങ്ങള്‍ക്കിടെയാണ് അപകടമുണ്ടായത്.
ഒരു കൂട്ടം ആളുകള്‍ പടിക്കിണറിന്റെ മേല്‍ക്കൂരയ്ക്കു മുകളില്‍ കയറി. അതോടെ മേല്‍ക്കൂര തകര്‍ന്നു വീഴുകയായിരുന്നു.

200 വര്‍ഷത്തോളം പഴക്കമുള്ള പടികിണറിന്റെ മുകളില്‍ നാല് ഇരുമ്പ് ഗര്‍ഡറുകള്‍ സ്ഥാപിച്ച് കനംകുറഞ്ഞ കോണ്‍ക്രീറ്റ് സ്ഥാപിക്കുകയായിരുന്നു. ഇതിനു മുകളിലേക്ക് ആളുകള്‍ കയറിനിന്നതോടെ കോണ്‍ക്രീറ്റ് ഇടിഞ്ഞുവീണാണ് അപകടമുണ്ടായത്.