ന്യൂഡല്‍ഹി: ലക്ഷദ്വീപ് അഡ്മിനിസ്‌ട്രേറ്റര്‍ പ്രഫുല്‍ ഖോഡാ പട്ടേല്‍ പുറപ്പെടുവിച്ച കരട് വിജ്ഞാപനത്തില്‍ ദീപ് നിവാസികള്‍ക്കുള്ള ആശങ്കകള്‍ പരിഹരിക്കുമെന്ന് ലക്ഷദ്വീപ് ബി.ജെ.പി നേതാക്കള്‍ക്ക് കേന്ദ്രത്തിന്റെ ഉറപ്പ്.

ഇന്നലെ ലക്ഷദ്വീപിന്റെ ചുമതലയുള്ള ദേശീയ ഉപാധ്യക്ഷന്‍ എ.പി അബ്ദുല്ലക്കുട്ടിക്കൊപ്പം ലക്ഷദ്വീപ് ഘടകം അധ്യക്ഷന്‍ അബ്ദുല്‍ഖാദര്‍, ഉപാധ്യക്ഷന്‍ കെ.പി മുത്തുക്കോയ എന്നിവര്‍ ആഭ്യന്തരമന്ത്രി അമിത്ഷായുമായി നടത്തിയ കൂടിക്കാഴ്ചയിലാണ് ഈ ഉറപ്പ് ലഭിച്ചത്. ലക്ഷദ്വീപ് അഡ്മിനിസ്‌ട്രേറ്ററെ മാറ്റണമെന്ന് നേതാക്കള്‍ ആവശ്യപ്പെട്ടെങ്കിലും അക്കാര്യത്തില്‍ ഉറപ്പൊന്നും ലഭിച്ചില്ല.

ബി.ജെ.പി അധ്യക്ഷന്‍ ജെ.പി നദ്ദയുമായും ഇവര്‍ കൂടിക്കാഴ്ച നടത്തി. ജനങ്ങളുടെ ആശങ്ക പരിഹരിക്കുമെന്ന് ഉറപ്പ് നല്‍കിയ നദ്ദയുടെ നിര്‍ദേശപ്രകാരമാണ് നേതാക്കള്‍ അമിത്ഷായുമായി കൂടിക്കാഴ്ച നടത്തിയത്. അഡ്മിനിസ്‌ട്രേറ്റര്‍ നടപ്പാക്കിയ ഗുണ്ടാ ആക്ട് കേന്ദ്രത്തിന്റെ നിര്‍ദേശപ്രകാരമല്ലെന്നും അമിത്ഷാ ലക്ഷദ്വീപ് ബി.ജെ.പി നേതാക്കളെ അറിയിച്ചു. ലക്ഷദ്വീപ് ജനതയെ ദ്രോഹിച്ചുകൊണ്ടുള്ള ഒരു നടപടിയും സ്വീകരിക്കില്ലെന്ന് അമിത് ഷാ ഉറപ്പ് നല്‍കി.
ഇപ്പോഴത്തേത് കരട് മാത്രമാണ്. ഇതേ രീതിയില്‍ നിയമം നടപ്പാക്കില്ല. ലക്ഷദ്വീപ് ജനതയുമായി കൂടിയാലോചിച്ച ശേഷം മാത്രമേ അവിടെ നിയമങ്ങള്‍ നടപ്പാക്കുകയുള്ളൂ എന്നും അമിത്ഷാ അറിയിച്ചതായും നേതാക്കള്‍ പറഞ്ഞു.