മാനന്തവാടി: ജില്ലാ ആശുപത്രി റോഡിലെ നടപാത തകര്‍ന്നു. കാല്‍നടയാത്രക്കാര്‍ ദുരിതത്തില്‍. സദാസമയവും നിരവധി വാഹനങ്ങള്‍ കടന്നു പോകുന്ന മാനന്തവാടി ജില്ലാ ആശുപത്രിക്ക് സമീപമുള്ള നടപാതയാണ് തകര്‍ന്നത്. പ്ലാസ്റ്റിക് നൂല്‍ കൊണ്ട് വലിച്ചുകെട്ടിയ അധികൃതര്‍ ഇത്രയും ദിവസമായിട്ടും നടപാതയിലെ അപകടം ഒഴിവാക്കാന്‍ ഒരു നടപടിയും ഇതുവരെ സ്വീകരിച്ചിട്ടില്ല.
ഇടുങ്ങിയ റോഡായതിനാല്‍ ഇരുവശത്തേക്കും വാഹനങ്ങള്‍ പോവുന്ന സമയത്ത് കാല്‍നടയാത്രക്കാര്‍ ഭീതിയിലാവുകയാണ്. കഴിഞ്ഞ ദിവസം ഈ റോഡിലാണ് ആംബുലന്‍സിന് സൈഡ് നല്‍കുന്നതിനിടെ ഓട്ടോറിക്ഷ കാല്‍നടയാത്രക്കാരനെ തട്ടിയത്. ഇതേ തുടര്‍ന്ന് ഓട്ടോ ഡ്രൈവര്‍മാരും നാട്ടുകാരും തമ്മില്‍ സംഘര്‍ഷമുണ്ടാവുകയും ഓട്ടോഡ്രൈവറെ മര്‍ദ്ദിച്ചെന്നാരോപിച്ച് ഡ്രൈവര്‍മാര്‍ ടൗണില്‍ പ്രകടനവും നടത്തിയിരുന്നു.
മാനന്തവാടി ജില്ലാ ആശുപത്രിക്ക് പുറമെ ഗവ. യു.പി സ്‌കൂള്‍, രജ്‌സ്ട്രാര്‍ ഓഫിസ്, പൊതുമരാമത്ത് വിഭാഗം ഓഫിസ്, വെറ്ററിനറി ആശുപത്രി, വില്ലേജ് ഓഫിസ്, ജില്ലാ മെഡിക്കല്‍ ഓഫിസ്, പഴശ്ശി മ്യൂസിയം തുടങ്ങിയ സ്ഥാപനങ്ങള്‍ സ്ഥിതിചെയ്യുന്നത് ഈ റോഡിലാണ്.
വിദ്യാര്‍ഥികളും രോഗികളുമടക്കം നൂറുകണക്കിനാളുകള്‍ ഉപയോഗിക്കുന്ന ഈ നടപാത തകര്‍ന്നിട്ട് ദിവസങ്ങളായിട്ടും നവീകരിക്കാത്ത അധികൃതരുടെ നിലപാടിനെതിരേ പ്രതിഷേധം വ്യാപകമായിട്ടുണ്ട്.