നിര്‍ണായക സമയത്ത് യുണൈറ്റഡിന് തലവേദന; മൂന്ന് സൂപ്പര്‍ താരങ്ങള്‍ക്ക് പരിക്കെന്ന് പരിശീലകന്‍

നീണ്ട കാലത്തെ തുടരെയുള്ള തിരിച്ചടികള്‍ക്കും തകര്‍ച്ചക്കും ശേഷം തിരിച്ചുവരവിന്റെ പാതയിലാണ് ഇംഗ്ലീഷ് ക്ലബ്ബായ മാഞ്ചസ്റ്റര്‍ യുണൈറ്റഡ്.
തുടര്‍ച്ചയായ കിരീട വരള്‍ച്ചക്ക് ശേഷം കരബാവോ കപ്പ് സ്വന്തമാക്കിയ യുണൈറ്റഡ് എഫ്.എ കപ്പിലും ഫൈനലിലെത്തി നില്‍ക്കുന്നുണ്ട്.

ചാമ്പ്യന്‍സ് ലീഗിലും യോഗ്യത ഏതാണ്ട് ഉറപ്പിച്ചിരിക്കുന്ന ക്ലബ്ബിന് എന്നാല്‍ ഇപ്പോള്‍ തുടര്‍തിരിച്ചടികളുടെ കാര്യമാണ്.
പരിക്കാണ് മാന്‍ യുണൈറ്റഡിനെ വലക്കുന്ന പ്രധാന പ്രശ്‌നം. പ്രിമിയര്‍ ലീഗ് അതിന്റെ അവസാന ഘട്ടത്തിലേക്ക് എത്തുന്ന വേളയില്‍ താരങ്ങള്‍ക്ക് പരിക്കേല്‍ക്കുന്നത് ക്ലബ്ബിനെ സംബന്ധിച്ച് ഒട്ടും ആശ്വാസ്യകരമായ കാര്യമല്ല.

ഇപ്പോള്‍ ബ്രൂണോ ഫെര്‍ണാണ്ടസ്, ഗര്‍ണാച്ചോ, സ്‌കോട്ട് മക്ടോമിനായി എന്നീ താരങ്ങള്‍ക്ക് ഇപ്പോള്‍ യുണൈറ്റഡ് നിരയില്‍ പരിക്കാണെന്ന് അറിയിച്ചിരിക്കുകയാണ് യുണൈറ്റഡിന്റെ ഡച്ച് പരിശീലകനായ എറിക് ടെന്‍ ഹാഗ്.മാര്‍ച്ച് 27ന് ലണ്ടന്‍ ക്ലബ്ബായ ടോട്ടന്‍ഹാമിനെതിരെ നടക്കാനിരിക്കുന്ന നിര്‍ണായകമായ സന്ദര്‍ഭത്തില്‍ ഗര്‍ണാച്ചോയും മക്ടോമിനായും കളിച്ചേക്കില്ല എന്നും ടെന്‍ ഹാഗ് പറഞ്ഞു. ബ്രൂണോ സ്‌പേഴ്‌സിനെതിരെ കളിക്കുമോ എന്ന കാര്യവും സംശയത്തിലാണ്.

ടോട്ടന്‍ഹാമിനെതിരായ മത്സരത്തിന് മുമ്പ് എം.യു.ടി.വിക്ക് നല്‍കിയ അഭിമുഖത്തിലാണ് ടീമിനുള്ളിലെ പരിക്കിനെക്കുറിച്ച് ടെന്‍ ഹാഗ് തുറന്ന് പറഞ്ഞത്.'ബ്രൂണോയുടെ കാര്യം ഒരു ചോദ്യചിഹ്നമാണ്. പരിക്ക് പറ്റിയിട്ടും കഴിഞ്ഞ മത്സരത്തില്‍ എക്‌സ്ട്രാ ടൈം വരെ അദേഹം കളിച്ചു,' ടെന്‍ ഹാഗ് പറഞ്ഞു.

'ഗര്‍ണാച്ചോ തിരിച്ചുവന്നിട്ടുണ്ടെങ്കിലും അടുത്ത മത്സരത്തിന് അദേഹം കളിക്കില്ല. സ്‌കോട്ടും അടുത്ത മത്സരത്തിന് ഉണ്ടാവില്ല. ഒരുപാട് ഫൈനല്‍ കണക്കെയുളള നിര്‍ണായക മത്സരങ്ങളാണ് ഞങ്ങള്‍ക്കിനി കളിക്കാനുള്ളത്. എന്നാല്‍ കളിക്കളത്തില്‍ എന്ത് ചെയ്യണമെന്ന് ഞങള്‍ക്ക് വ്യക്തമായ ധാരണയുണ്ട്,' ടെന്‍ ഹാഗ് പറഞ്ഞു.
അതേസമയം നിലവില്‍ 30 മത്സരങ്ങളില്‍ നിന്നും 18 വിജയങ്ങളോടെ 59 പോയിന്റുമായി പ്രിമിയര്‍ ലീഗില്‍ നാലാം സ്ഥാനത്താണ് മാന്‍ യുണൈറ്റഡ്.

Content Highlights: Ten Hag Said Three Manchester United Players Are Injuired

നിര്‍ണായക സമയത്ത് യുണൈറ്റഡിന് തലവേദന; മൂന്ന് സൂപ്പര്‍ താരങ്ങള്‍ക്ക് പരിക്കെന്ന് പരിശീലകന്‍