മലപ്പുറം: ജന്മനാ ഗര്‍ഭപാത്രമില്ലാത്തവരെ അംഗപരിമിതരായി കണക്കാക്കണമെന്ന ആവശ്യം മാനുഷികമായി പരിഗണിക്കണമെന്ന് സംസ്ഥാന മനുഷ്യാവകാശ കമ്മിഷന്‍ അംഗം കെ. മോഹന്‍കുമാര്‍. മലപ്പുറം കൊടക്കാട് സ്വദേശിനി സമര്‍പ്പിച്ച പരാതിയിലാണ് നടപടി.

കോഴിക്കോട് മെഡിക്കല്‍ കോളജിലെ മെഡിക്കല്‍ ബോര്‍ഡ് തന്റെ മകള്‍ക്ക് ഗര്‍ഭപാത്രമില്ലെന്ന് കണ്ടെത്തിയിട്ടുണ്ട്. അതുമായി ബന്ധപ്പെട്ട ദുരിതങ്ങള്‍ ദിനംപ്രതി അനുഭവിച്ചുവരുന്ന മകളെ അംഗപരിമിതരുടെ പട്ടികയില്‍ ഉള്‍പ്പെടുത്തണമെന്നായിരുന്നു ആവശ്യം. ഇതുസംബന്ധിച്ച് കമ്മിഷന്‍ ആരോഗ്യവകുപ്പില്‍നിന്ന് വിശദീകരണം തേടിയിരുന്നു. തുടര്‍ന്ന് പ്രത്യുല്‍പാദനത്തിനാവശ്യമായ അവയവങ്ങള്‍ ഇല്ലാത്തത് അംഗപരിമിതിയല്ലെന്ന് കേന്ദ്ര, സംസ്ഥാന നിയമങ്ങളിലുള്ളതായി ആരോഗ്യവകുപ്പ് ഡയറക്ടര്‍ കമ്മിഷനെ അറിയിച്ചു.

അതേസമയം, ഇക്കാര്യം സര്‍ക്കാരിന് പരിഗണിക്കാമെന്നും ആരോഗ്യവകുപ്പ് നല്‍കിയ വിശദീകരണത്തില്‍ പറയുന്നുണ്ട്. ഉത്തരവ് ചീഫ് സെക്രട്ടറിക്കും ആരോഗ്യ സെക്രട്ടറിക്കും അയച്ചിട്ടുണ്ട്.