ഖോവായ് (ത്രിപുര): തിപുരയില്‍ പശുക്കടത്താരോപിച്ച് മൂന്ന് മുസ്‌ലിം യുവാക്കളെ ആള്‍ക്കൂട്ടം തല്ലിക്കൊന്നു. ത്രിപുരയിലെ ഖോവായ് ജില്ലയില്‍ ഇന്ന് പുലര്‍ച്ചെ 4.30 യോടെയായിരുന്നു സംഭവം.

സഈദ് ഹുസൈന്‍, ബിലാല്‍ മിയ, സൈഫുല്‍ ഇസ്‌ലാം എന്നിവരാണ് കൊല്ലപ്പെട്ടതെന്ന് ഖോവായ് ജില്ലാ പൊലിസ് സൂപ്രണ്ട് കിരണ്‍ കുമാര്‍ പറഞ്ഞു. സെപഹിജാല ജില്ലയിലെ സോനമുറ സ്വദേശികളാണ് മൂവരും.

പുലര്‍ച്ചെ അഞ്ചോളം കന്നുകാലികളുമായി വരികയായിരുന്ന ട്രക്ക് അക്രമകാരികള്‍ പിന്തുടര്‍ന്ന് ത്രിപുരയിലെ നാമന്‍ജോയ്പാറ ഗ്രാമത്തില്‍ വെച്ച് തടയുകയായിരുന്നു. വണ്ടിയിലുണ്ടായവരെ മാരക ആയുധങ്ങളുമായി അക്രമിച്ചു. സഈദിനെയും ബിലാലിനെയും അക്രമിക്കുന്നതിനിടയില്‍ സൈഫുല്‍ രക്ഷപ്പെടാനായി ഓടിയെങ്കിലും ആള്‍ക്കൂട്ടം ഇദ്ദേഹത്തെയും പിന്തുടര്‍ന്ന് മര്‍ദിക്കുകയായിരുന്നു.

ഗുരുതരമായി പരിക്കേറ്റ മൂന്നുപേരെയും സമീപത്തെ ആശുപത്രിയിലും പിന്നീട് അഗര്‍ത്തലയിലുള്ള ഗോവിന്ദ് ഭല്ലഭ് പന്ത് ആശുപത്രിയിലും എത്തിച്ചു. എന്നാല്‍ അവര്‍ മരണത്തിന് കീഴടങ്ങി. സംഭവത്തില്‍ അന്വേഷണം പുരോഗമിക്കുകയാണെന്ന് പൊലിസ് പ്രതികരിച്ചു.