ഖാലിദ് തുറമുഖത്ത് 14,000ത്തിലധികം നിയമ വിരുദ്ധമായ വേദന സംഹാരികള്‍ ഉള്‍പ്പെടെയുള്ള നിരോധിത വസ്തുക്കള്‍ കണ്ടുകെട്ടി.

ഷാര്‍ജ: ഷാര്‍ജ കസ്റ്റംസ് ഒമ്പത് മയക്കുമരുന്ന് കടത്ത് ശ്രമങ്ങള്‍ പരാജയപ്പെടുത്തുകയും ഈ വര്‍ഷം ആദ്യ മൂന്ന് മാസങ്ങള്‍ക്കിടെ 60 കിലോയിലധികം മയക്കുമരുന്ന് പിടികൂടുകയും ചെയ്തു.
ഷാര്‍ജയിലെ ഖാലിദ് തുറമുഖത്ത് നിന്ന് 60.22 കിലോ ഗ്രാം മയക്കുമരുന്നും 14,378 നിയമ വിരുദ്ധ വേദന സംഹാരികളും ഉദ്യോഗസ്ഥര്‍ കണ്ടു കെട്ടി.
ശീതീകരിച്ച പാത്രങ്ങള്‍ക്കുള്ളില്‍ ഒളിപ്പിച്ചതുള്‍പ്പെടെ വിവിധ മാര്‍ഗങ്ങളിലൂടെയാണ് നിരോധിത വസ്തുക്കള്‍ കടത്താന്‍ ശ്രമിച്ചതെന്ന് ഷാര്‍ജ പോര്‍ട്ട് കസ്റ്റംസ് ആന്‍ഡ് ഫ്രീ സോണ്‍ അഥോറിറ്റി അറിയിച്ചു.
ജീവനക്കാരുടെ തുടര്‍ച്ചയായ പരിശീലനവും അത്യാധുനിക സാങ്കേതിക വിദ്യകളുടെയും ഉപകരണങ്ങളുടെയും ഉപയോഗവും കള്ളക്കടത്ത് ശ്രമങ്ങള്‍ തടയാനുള്ള ശ്രമങ്ങളില്‍ നിര്‍ണായക പങ്ക് വഹിച്ചതായി ഖാലിദ് പോര്‍ട്ട് കസ്റ്റംസ് സെന്റര്‍ ഡയറക്ടര്‍ സാലം അല്‍ സൂമൂര്‍ പറഞ്ഞു.
''ഇത് ജോലി മെച്ചപ്പെടുത്തുകയും ഷാര്‍ജയിലെ പോര്‍ട്ട് പോയിന്റുകളിലുടനീളം യാത്രക്കാരുടെയും ചരക്കുകളുടെയും സുഗമമായ ഒഴുക്ക് ഉറപ്പാക്കുകയും ചെയ്യുന്നു'' -അദ്ദേഹം പറഞ്ഞു. ശീതീകരിച്ച ഭക്ഷണം, കാര്‍ഷിക ഉല്‍പന്നങ്ങള്‍, മൃഗങ്ങള്‍, വാഹനങ്ങള്‍, ഹെവി ഉപകരണങ്ങള്‍, ഉണങ്ങിയ വസ്തുക്കള്‍ എന്നിവയുള്‍പ്പെടെ വൈവിധ്യമാര്‍ന്ന കാര്‍ഗോ ഖാലിദ് തുറമുഖത്തെ ഇന്‍സ്‌പെക്ടര്‍മാര്‍ സ്ഥിരമായി കൈകാര്യം ചെയ്യാറുണ്ട്.
ഇതാദ്യമായല്ല ഷാര്‍ജയില്‍ വന്‍ മയക്കുമരുന്ന് കയറ്റുമതി പിടികൂടുന്നത്. മയക്കുമരുന്ന് വിതരണം ചെയ്യാന്‍ ഡെലിവറി ഡ്രൈവര്‍മാരെ ഉപയോഗിച്ചുവെന്നാരോപിച്ച് ഈ മാസം ആദ്യം ഷാര്‍ജ പൊലീസ് ഒരു ക്രിമിനല്‍ സംഘത്തെ പിടികൂടിയിരുന്നു.
എമിറേറ്റുകളിലുടനീളമുള്ള എന്‍ഫോഴ്‌സ്‌മെന്റ് ഏജന്‍സികളുടെ പിന്തുണയോടെ നടത്തിയ ഓപറേഷനില്‍ ഗൂഢാലോചനയുമായി ബന്ധപ്പെട്ട് ഏഴ് ഏഷ്യന്‍ പൗരന്മാരെ ആന്റി നാര്‍കോട്ടിക് ഉദ്യോഗസ്ഥര്‍ അറസ്റ്റ് ചെയ്തു.
സൂചന ലഭിച്ചതിനെ തുടര്‍ന്ന് പൊലീസ് സംഘത്തെ നിരീക്ഷണത്തിലാക്കിയെങ്കിലും ഡെലിവറി റൈഡര്‍മാര്‍ക്ക് അവര്‍ കൊണ്ടുപോകുന്ന സാധനങ്ങളെ കുറിച്ച് എന്തെങ്കിലും അറിവുണ്ടാവാന്‍ സാധ്യതയില്ലെന്ന് പറഞ്ഞു.അബുദാബിയില്‍ 'ഡ്രൈഡ് ആപ്രികോട്ട്' എന്ന് ലേബല്‍ ചെയ്ത പെട്ടികളില്‍ 2.25 ദശലക്ഷം ക്യാപ്റ്റഗണ്‍ ഗുളികകള്‍ കണ്ടെത്തിയതിനെ തുടര്‍ന്ന് മൂന്ന് പേരെ അറസ്റ്റ് ചെയ്തു.
മയക്കുമരുന്നുകളില്‍ ചിലത് യുഎഇയില്‍ വിറ്റ് ബാക്കിയുള്ളവ അയല്‍ രാജ്യത്തേക്ക് കൊണ്ടു പോകാനായിരുന്നു കള്ളക്കടത്തുകാരുടെ പദ്ധതിയെന്ന് അബുദാബി പൊലീസ് പറഞ്ഞു.
രാജ്യത്തുടനീളമുള്ള അധികൃതരുമായുള്ള സമഗ്രമായ ആസൂത്രണത്തിനും സഹകരണത്തിനും പൊലീസ് ഓപറേഷന്‍സ് വിഭാഗം നന്ദി പറഞ്ഞു.
മയക്കുമരുന്ന് കടത്താനുള്ള പദ്ധതിയെ കുറിച്ച് മുന്നറിയിപ്പ് ലഭിച്ചതിനെ തുടര്‍ന്ന് മൂന്ന് പേരുടെ നീക്കങ്ങള്‍ ഉദ്യോഗസ്ഥര്‍ നിരീക്ഷിച്ചു. ഇവരെ അറസ്റ്റ് ചെയ്യുകയും അയല്‍ എമിറേറ്റിലെ മൂന്ന് വ്യത്യസ്ത അപാര്‍ട്ട്‌മെന്റുകളില്‍ ഒളിപ്പിച്ച മയക്കുമരുന്ന് കണ്ടു കെട്ടുകയും ചെയ്തു.