ഒഡീഷ ട്രെയിന്‍ ദുരന്തം: പരുക്കേറ്റവരില്‍ നാല് മലയാളികളും

തൃശൂര്‍: ഒഡീഷയിലുണ്ടായ ട്രെയിന്‍ ദുരന്തത്തില്‍ തൃശൂര്‍ അന്തിക്കാട് സ്വദേശികളായ നാലുപേര്‍ക്ക് പരുക്ക്. അന്തിക്കാട് കണ്ടശ്ശാംകടവ് സ്വദേശികളായ രഘു, കിരണ്‍, വൈശാഖ്, ലിജീഷ് എന്നിവര്‍ക്കാണ് നിസാരപരുക്കേറ്റത്. അപകടത്തില്‍പെട്ട കൊറമാണ്ഡല്‍ എക്‌സ്പ്രസിലെ യാത്രക്കാരായിരുന്നു ഇവര്‍.

ഒരാളുടെ പല്ലുകള്‍ തകര്‍ന്നു, മറ്റൊരാള്‍ക്ക് കൈയ്ക്കും പരുക്കുണ്ട്. അപകടം നടന്ന സ്ഥലത്തിന് സമീപത്തെ വീട്ടില്‍ വിശ്രമിക്കുകയാണ് ഇവര്‍. വീട്ടുകാരുടെ സഹായത്തോടെ നാട്ടിലേക്ക് വിളിച്ചു.

ഒരു ക്ഷേത്ര നിർമ്മാണവുമായി ബന്ധപ്പെട്ടുള്ള ജോലികൾക്ക് വേണ്ടി കൊൽക്കത്തയിൽ പോയി തിരിച്ചു വരുന്നതിനിടയിലാണ് ഇവർ അപകടത്തിൽപ്പെട്ടത്.അന്തിക്കാട് സ്വദേശികളായ എട്ടുപേരാണ് നിർമ്മാണ പ്രവർത്തനങ്ങൾക്ക് വേണ്ടി കൊൽക്കത്തയിലേക്ക് പോയിരുന്നത്. ഇതിൽ കരാറുകാരൻ ഉൾപ്പെടെ നാലുപേർ കഴിഞ്ഞ ദിവസം അന്തിക്കാട് തിരികെയെത്തിയിരുന്നു. ബാക്കി നാലു പേർ ഇന്ന് ട്രെയിനിൽ തിരികെ വരുന്നതിനിടെയാണ് അപകടത്തിൽ പെട്ടത്.

യശ്വന്ത്പുരില്‍നിന്ന് ഹൗറയിലേക്ക് പോവുകയായിരുന്നു സൂപ്പര്‍ ഫാസ്റ്റ് എക്‌സ്പ്രസ്(12864), കൊല്‍ക്കത്തയില്‍നിന്ന് ചെന്നൈയിലേക്ക് പോവുകയായിരുന്ന കോറമണ്ഡല്‍ എക്‌സ്പ്രസ്(12841), ചരക്കുതീവണ്ടി എന്നിവയാണ് അപകടത്തില്‍പെട്ടത്.