'മിയാസാക്കി' ലോകത്തിലെ ഏറ്റവും വിലകൂടിയ മാങ്ങ, കിലോയ്ക്ക് വില മൂന്ന് ലക്ഷത്തോളം

മലയാളികള്‍ക്ക് എന്നും ഏറെ പ്രിയമാണ് മാമ്പഴ വിശേഷങ്ങള്‍. ലോകത്തു തന്നെ ഏറ്റവും രുചിയൂറുന്ന ഫലങ്ങളില്‍ ഒന്നാണിത്. എന്നാല്‍ ഒരു അതിശയ മാമ്പഴത്തിന്റെ വിശേഷം പറഞ്ഞാലോ. 'മിയാസാക്കി' എന്നാണ് മാമ്പഴത്തിന്റെ പേര്. പേര് പോലെ തന്നെ ജപ്പാന്‍ സ്വദേശിയാണ്. ഇതിന്റെ വില കേട്ടാല്‍ നിങ്ങള്‍ ഞെട്ടും. മൂന്നു ലക്ഷത്തോളം. 2.75- 3 ലക്ഷം. ജപ്പാനിലെ മിയാസാക്കി എന്ന നഗരത്തിന്റെ പേരില്‍ നിന്നാണ് മാങ്ങകള്‍ക്ക് മിയാസാക്കിയെന്ന് പേര് ലഭിക്കുന്നത്. ജപ്പാനില്‍ സാധാരണയായി കാണപ്പെടുന്ന ഈ മാമ്പഴത്തിന്റെ വിളവെടുപ്പ് സീസണ്‍ പ്രധാനമായും ഏപ്രില്‍ മുതല്‍ ആഗസ്റ്റ് വരെയാണ്.

പശ്ചിമബംഗാളിലെ സിലിഗുരിയിലെ മാംഗോ ഫെസ്റ്റിവല്‍ ഏഴാം എഡിഷനില്‍ ഈ മാമ്പഴമുണ്ട്. ഇവിടെ കിലോയ്ക്ക് 2.74 ലക്ഷം രൂപയാണ് വില. മോഡെല്ല കെയര്‍ടേക്കര്‍ സെന്റര്‍ ആന്‍ഡ് സ്‌കൂളും അസോസിയേഷന്‍ ഓഫ് കണ്‍സെര്‍വേഷന്‍ ആന്‍ഡ് ടൂറിസവും ചേര്‍ന്നാണ് മാംഗോ ഫെസ്റ്റിവല്‍ സംഘടിപ്പിച്ചിരിക്കുന്നത് .വൈവിധ്യമുള്ള നിരവധി മാങ്ങായിനങ്ങളാണ് ഫെസ്റ്റിവലില്‍ പ്രദര്‍ശിപ്പിച്ചിരിക്കുന്നത്, 262 ഇനങ്ങളാണ് ഇത്തവണ പ്രദര്‍ശിപ്പിച്ചത്.

മിയാസാക്കി മാമ്പഴം പഴുക്കുമ്പോള്‍ ആകര്‍ഷകമായ പരിവര്‍ത്തനത്തിന് വിധേയമാകുന്നു എന്നതാണ് ഇതിന്റെ മറ്റൊരു പ്രത്യേകത. തുടക്കത്തില്‍ പര്‍പ്പിള്‍ നിറമാണെങ്കില്‍, മാമ്പഴത്തിന്റെ പാകമാകുമ്പോള്‍ കടുത്ത ചുവപ്പായി മാറുന്നു. ഒരു മാമ്പഴത്തിന് ഏകദേശം 350 ഗ്രാം മുതല്‍ 900 ഗ്രാം വരെ തൂക്കമുണ്ടാവും. ആന്റി ഓക്‌സിഡന്റുകള്‍, ബീറ്റാ കരോട്ടിന്‍, ഫോളിക് അസിഡ് എന്നിവയുടെയെല്ലാം മികച്ച സ്രോതസ്സാണ് മിയാസാക്കി മാമ്പഴം എന്നും പറയുന്നു.

ഈ മാമ്പഴത്തിന് വലിയ തരത്തിലുള്ള കാവലുകള്‍ ഉടമകള്‍ ഏര്‍പ്പെടുത്താറുണ്ട്. നേരത്തെ ഇന്ത്യയില്‍ ഒരു ദമ്പതികള്‍ ഈ മാമ്പഴം കൃഷി ചെയ്തിരുന്നു. അന്ന് അത് സംരക്ഷിക്കാന്‍ 6 നായ്ക്കളെയും കാവല്‍ക്കാരെയും ഏര്‍പ്പാടാക്കിയത് വാര്‍ത്തയായിരുന്നു.

world's-most-expensive-mango-'miyazaki'-cost-around-rs-2-75-lakh-per-kg