'പുതിയ ബ്ലോക്ക് തുറക്കാത്തതിനു പിന്നിൽ ആരോഗ്യ മന്ത്രി'; പാർട്ടിക്കുള്ളിൽ വിമർശനം
കോട്ടയം: ബിന്ദുവിൻ്റെ മരണം നടക്കുന്നതിൻ്റെ തലേന്ന് മന്ത്രി വീണാജോർജിനെതിരേ പാർട്ടിക്കുള്ളിൽ ഉയർന്നത് കടുത്ത വിമർശനം. 

ഗവ.മെഡിക്കൽ കോളജ് പുതിയ സർജിക്കൽ ബ്ലോക്ക് നിർമാണം പൂർത്തിയാക്കി മാസങ്ങൾ കഴിഞ്ഞിട്ടും തുറന്നു കൊടുക്കാത്തതിന് പിന്നിൽ മന്ത്രിയുടെ പിടിവാശിയെന്നാണ് ഉയർന്ന വിമർശനം. അപകടത്തലേന്ന് ഏറ്റുമാനൂർ ഏരിയാ കമ്മറ്റിയിലെ യുവ നേതാവാണ് മന്ത്രിക്കെതിരേ ആരോപണം ഉന്നയിച്ചത്. 

ALSO READ: തരൂർ ഇസ്‌റാഈൽ എംബസി വിരുന്നിൽ പങ്കെടുത്തു: പാർട്ടിക്കുള്ളിൽ വിവാദ തീ

തദ്ദേശ തെരഞ്ഞെടുപ്പിന് മുന്നോടിയായി സി.പി.എം സംഘടിപ്പിച്ച ശിൽപശാലയിലായിരുന്നു വിമർശനം. മന്ത്രിയുടെ സൗകര്യാർത്ഥം ജില്ലയിലെ  ഉദ്ഘാടനങ്ങളെല്ലാം ഒരേ ദിവസം തന്നെ നടത്തണമെന്ന പിടിവാശിയാണ് ബ്ലോക്കിന്റെ ഉദ്ഘാടനം വൈകാൻ കാരണമെന്ന് പ്രതിനിധി ചൂണ്ടിക്കാട്ടി. ജനങ്ങളെ ദ്രോഹിക്കുന്ന നിലപാടുകൾ തിരുത്തണമെന്നും വിമർശനമുയർന്നു. 
ജില്ലയിലെ പല ആശുപത്രികളിലും നിർമാണം പൂർത്തീകരിച്ച കെട്ടിടങ്ങൾ തുറന്നു നൽകിയിട്ടില്ല. ഇവയെല്ലാം മന്ത്രിക്ക് സൗകര്യമുള്ള ദിവസത്തിനായി കാത്തുകിടക്കുകയാണെന്നും പ്രതിനിധി തുറന്നടിച്ചു. 

മന്ത്രി വി.എൻ. വാസവനും സി.പി.എം. ജില്ലാ സെക്രട്ടറി ടി.ആര്‍ രഘുനാഥനും, സംസ്ഥാന കമ്മിറ്റി അംഗം കെ.അനിൽകുമാറുമടക്കം പങ്കെടുത്ത ശിൽപശാലയിൽ ആയിരുന്നു ആരോപണം. ഒടുവിൽ ഒരു വീട്ടമ്മയുടെ മരണത്തിൽ കലാശിച്ച സംഭവങ്ങളെ തുടർന്നാണ് രോഗികൾക്കായി പുതിയ ബ്ലോക്ക് തുറന്നു നൽകിയത്. 

10,11,12,13,14,15,17,24 എന്നീ വാർഡുകളും റേഡിയോ ഡയഗ്നോസിസ് വകുപ്പും സെൻട്രൽ സ്റ്റെറൈൽ സപ്ലൈ വകുപ്പും  പുതിയ സർജിക്കൽ ബ്ലോക്കിലേക്കും സി.എൽ നാല് വാർഡിലേക്കുമായി മാറ്റി പ്രവർത്തനം ആരംഭിച്ചു. രോഗികളെ പുതിയ വാർഡുകളിലേക്ക് മാറ്റി.

A controversy is brewing over the delayed opening of a new surgical block at a government medical college, allegedly due to a minister's insistence on scheduling the inauguration on a specific date. Critics argue this stance is causing hardship to the public.