ഹജ്ജ് തീര്‍ത്ഥാടകരുടെ യാത്ര സുഖപ്രദമാക്കാന്‍ കൂടുതല്‍ സൗകര്യങ്ങളൊരുക്കാന്‍ സഊദി. തീര്‍ത്ഥാടകര്‍ക്കായി ആര്‍ട്ടിഫിഷ്യല്‍ ഇന്റലിജന്‍സ് ഉപയോഗിച്ച് പ്രവര്‍ത്തിക്കുന്ന ഡ്രൈവറില്ലാ ഇലക്ട്രിക്ക് ബസ് പരീക്ഷിക്കാനൊരുങ്ങുകയാണ് സഊദി എന്ന റിപ്പോര്‍ട്ട് പുറത്ത് വന്നിട്ടുണ്ട്. ഗതാഗത മേഖലയില്‍ നവീനമായ സാങ്കേതികവിദ്യകള്‍ ഉപയോഗിക്കുക, മലീനീകരണം പരമാവധി കുറക്കുക മുതലായവയൊക്കെയാണ് ഇത്തരം നീക്കങ്ങള്‍ക്ക് പിറകില്‍ എന്നാണ് രാജ്യത്തെ ട്രാന്‍സ്‌പോര്‍ട്ട് ജനറല്‍ അറിയിച്ചിരിക്കുന്നത്.മുന്‍കൂട്ടി നിശ്ചയിച്ചിട്ടുളള റൂട്ടുകളില്‍ പാതയില്‍ സ്ഥാപിച്ചിട്ടുളള സെന്‍സറുകള്‍, ക്യാമറകള്‍ എന്നിവയുടെ സഹായത്തോടെയാണ് ഈ ഡ്രൈവറില്ലാ ബസുകള്‍ സഞ്ചരിക്കുന്നത്.

11 സീറ്റുകള്‍ വീതമുളള ഒരോ ബസിനും ഫുള്‍ ചാര്‍ജില്‍ ആറ് മണിക്കൂര്‍ വരെ പ്രവര്‍ത്തിക്കാന്‍ സാധിക്കും. മണിക്കൂറില്‍ പരമാവധി 30 കിലോമീറ്റര്‍ വരെയാണ് ഈ ബസുകള്‍ക്ക് കൈവരിക്കാന്‍ കഴിയുന്ന വേഗത.കൂടാതെ ബസുകളില്‍ നിന്നും ലഭിക്കുന്ന ഡാറ്റ വിശകലനം ചെയ്യുകയും അത് വഴി ഈ സംവിധാനം കൂടുതല്‍ കാര്യക്ഷമമായും കൃത്യമായും ഉപയോഗിക്കാന്‍ സാധിക്കുകയും ചെയ്യും.നിലവില്‍ ഹജ്ജിനെത്തുന്ന തീര്‍ഥാടകരുടെ യാത്രയ്ക്കായാണ് ആര്‍ട്ടിഫിഷ്യല്‍ ഇന്റലിജന്‍സില്‍ അധിഷ്ഠിതമായ ഡ്രൈവര്‍ലെസ് ബസുകള്‍ എത്തുന്നതെങ്കില്‍ ഭാവിയില്‍ ഇത് രാജ്യത്തിന്റെ പൊതുഗതാഗത മേഖലയില്‍ ഉപയോഗപ്പെടുത്തുന്നതും സൗദി ലക്ഷ്യമിടുന്നുണ്ട്.

ആധുനിക സാങ്കേതികവിദ്യയും സ്മാര്‍ട്ട് മൊബിലിറ്റി സാധ്യതകളും സ്വീകരിക്കുന്നതിനൊപ്പം യാത്രക്കാര്‍ക്ക് ഏറ്റവും മികച്ച യാത്രയും സാമാധാന പരമായ അന്തരീക്ഷവും ഒരുക്കുകയാണ് സൗദിയുടെ ലക്ഷ്യം.

Content Highlights:saudi arabia introduce self driving ev vehicles to transport hajj pilgrims