കണ്ണീരണിഞ്ഞ് അറഫാത്, മനസിലും ചുണ്ടിലും ഇലാഹീ ചിന്ത മാത്രം; ആത്മ നിർവൃതിയിൽ തീർത്ഥാടക ലക്ഷങ്ങൾ

അറഫാത്: ആഗോള സാഹോദര്യത്തിന്റെ വിളബരവുമായി തീർത്ഥാടക ലക്ഷങ്ങൾ അറഫാതിൽ സമ്മേളിച്ചു. ആത്മീയ വിശുദ്ധി തേടിയുള്ള തീർഥാടക ലക്ഷങ്ങളുടെ സംഗമത്തിൽ ലോകസമാധാനത്തിനും ശാന്തിക്കും വേണ്ടിയുള്ള ജനക്ഷങ്ങളുടെ ഉള്ളുരുകിയുള്ള പ്രാർത്ഥനയുമുയർന്നു. ലോകത്തിലെ ഏറ്റവും വലിയ മനുഷ്യ മഹാസംഗമ വേദിയായ അറഫാതിൽ ഒത്തുകൂടിയ വിശ്വാസികൾ സൂര്യൻ അസ്തമിക്കുന്നത് വരെ ഒരേ ചിന്തയോടെ പ്രാർഥനയിൽ മുഴുകി.

വർണ്ണ, ദേശ, ഭാഷാ, വ്യത്യാസമില്ലാതെ അല്ലാഹുവിന്റെ മുന്നിൽ എല്ലാവരും സമന്മാരാണെന്ന ഉജ്ജ്വല സന്ദേശം ലോകത്തിനു സമ്മാനിച്ചാണ് അറഫ മഹാ സംഗമത്തിന് സമാപനമായത്. ലോകത്തിന്റെ വിവിധ ഭാഗങ്ങളിൽ നിന്നെത്തിയ ഇരുപത് ലക്ഷത്തിലധികം ഹാജിമാർ ഒരേ ലക്ഷ്യവുമായി ഇലാഹീ ചിന്തയിൽ മുഴുകി. പാപമോചനം തേടിയും ജീവിത വിശുദ്ധിക്കായി സ്രഷ്ടാവിനോട് ഉള്ളുരുകി പ്രാർഥിച്ചും സ്വർഗത്തിന് വേണ്ടിയുള്ള ഉൽക്കടമായ ആഗ്രഹത്താലും അറഫയിൽ ഹാജിമാർ പകൽ ചെലവിട്ടു.

മിനായിൽ നിന്നും തിങ്കളാഴ്ച രാത്രി തന്നെ അറഫാത് മൈതാനിയെ ലക്ഷ്യമാക്കി ഹാജിമാർ പുറപ്പെട്ടു തുടങ്ങിയിരുന്നു. ഇന്നലെ ഉച്ചയോടെ തന്നെ ഹാജിമാരെല്ലാം അറഫാതിൽ എത്തിച്ചേർന്നു അറഫാ സംഗമത്തിന് സജ്ജമായി. ദുഹ്ർ നിസ്‌കാരത്തോടെ ആരംഭിച്ച അറഫ സംഗമ ചടങ്ങുകൾ വൈകീട്ട് സൂര്യാസ്തമനത്തോടെയാണ് സമാപിച്ചത്. ദുഹ്ർ ബാങ്കിന് ശേഷം ആരംഭിച്ച അറഫ സംഗമത്തിന് നമിറ മസ്‌ജിദിൽ ഡോ.യൂസുഫ് ബിൻ മുഹമ്മദ് ബിൻ സഈദ് ചരിത്ര പ്രസംഗത്തെ അനുസ്‌മരിച്ചു ഖുതുബ നിർവ്വഹിച്ചു.

ലോക സമാധാനത്തിനും ശാന്തിക്കും മനുഷ്യർ തമ്മിലുള്ള ഐക്യം മാത്രമാണ് പ്രതിവിധിയെന്ന് അറഫ പ്രസംഗത്തിൽ ഡോ.യൂസുഫ് ബിൻ മുഹമ്മദ് ബിൻ സഈദ് ഉണർത്തി. പരസ്പര സ്‌നേഹത്തിലൂടെ മാത്രമേ ലോകത്തിന് മുന്നോട്ട് ചലിക്കാനാകൂ. സ്വന്തം നന്മക്ക് വേണ്ടി മാത്രമല്ല, മറ്റുള്ളവരുടെ ക്ഷേമത്തിന് വേണ്ടിയും പ്രാർത്ഥിക്കണം. മതത്തിൽ ഭിന്നിക്കുന്നതിനേക്കാൾ വലിയ പാപമില്ലെന്നും അദ്ദേഹം പറഞ്ഞു. ഐക്യം നിലനിർത്താൻ ആവശ്യമായ സാമൂഹിക നിയമങ്ങൾ എല്ലാവരും പാലിക്കണമെന്നും അദ്ദേഹം വിശ്വാസികളെ ഉണർത്തി. ന

മിറ മസ്ജിദിന് സമീപം കിലോമീറ്ററുകളോളം പരന്നുകിടക്കുന്ന അറഫാതിൽ നിന്ന് ദുഹർ, അസ്വർ നിസ്‌കാരങ്ങൾ ചുരുക്കി ഒരുമിച്ച് നിസ്‌കരിച്ച ശേഷം വൈകുന്നേരം വരെ ഹാജിമാർ പ്രാർത്ഥനകളിൽ മുഴുകി. അറഫാതിൽ നിന്ന് സൂര്യാസ്തമനത്തോടെ മുസ്ദലിഫയിലേക്ക് നീങ്ങിയ ഹാജിമാർ ഇവിടെ നിന്നും കല്ലേറ് കർമ്മങ്ങൾക്ക് ആവശ്യമായ കല്ലുകൾ ശേഖരിച്ചു. ബുധൻ പുലർച്ചെ മിനായിലേക്ക് നീങ്ങുന്ന ഹാജിമാർ പിശാചിന്റെ സ്‌തൂപമായ ജംറതുൽ അഖബയിൽ കല്ലേറ് പൂർത്തിയാക്കി തല മുണ്ഡനം ചെയ്തു ഹജ്ജ് വസ്‌ത്രമായ ഇഹ്‌റാം വസ്‌ത്രം അഴിച്ചു വെച്ച് സാധാരണ വസ്‌ത്രത്തിലേക്ക് മാറും. തുടർന്ന് ത്വവാഫ് ചെയ്യാനായി മക്കയിലേക്ക് നീങ്ങും.

മക്കയിൽ ത്വവാഫിന് ശേഷം നേരത്തെ ഖുദൂമിന്റെ തവാഫിന് ശേഷം സഅയ് ചെയ്യാത്ത ഹാജിമാർ ഇത് പൂർത്തിയയാക്കിയ ശേഷം വീണ്ടും മിനയിലേക്ക് തന്നെ തിരിച്ചു പോകും. തുടർന്ന് മിനായിൽ രാപാർക്കുകയും അയ്യാമുത്തശ്‍രീഖിന്റെ മൂന്നു ദിവസങ്ങളിൽ ഏഴ് വീതം കല്ലെറിയുകയും ചെയ്യുന്നതോടെ ഈ വർഷത്തെ ഹജ്ജ് കർമ്മങ്ങൾക്ക് പരിസമാപ്‌തിയാകും.