കൊച്ചി: ചാഡിന്റെ അന്താരാഷ്ട്ര മിഡ്ഫീല്‍ഡര്‍ അസ്രാക്ക് യാസീന്‍ മഹമത് കേരള ബ്ലാസ്റ്റേഴ്‌സിനുവേണ്ടി ഇന്ത്യന്‍ സൂപ്പര്‍ ലീഗ് 2016-ല്‍ കളിക്കും. ഡിഫന്‍സീവ് മിഡ്ഫീല്‍ഡറായി കളിക്കുന്ന അസ്രാക്ക് ഗ്രീക്ക് ക്ലബായ ലെവഡിയാക്കോസ് എഫ്.സിക്കു വേണ്ടിയാണ് ഇപ്പോള്‍ കളിച്ചുകൊണ്ടിരുന്നത്. 2009ല്‍ എസ്പാന്യോള്‍-ബിക്കു വേണ്ടി ജേഴ്‌സിയണിഞ്ഞു. ഹാംസ്റ്റാഡ്‌സ് ബി.കെയിലും യു.ഡി മെലീല, എറ്റാല്‍ വെലിക്കോ ടാര്‍ണോവോ (എഫ്.കെ ഇറ്റാര്‍), ലോകോമോട്ടീവ് സോഫിയ, പ്ലാറ്റാനിയാസ് ചാനിയ എന്നിവയ്ക്കു വേണ്ടിയും കളിച്ചു.
2008ല്‍ ആദ്യമായി സുഡാനെതിരേ ചാഡ് ദേശീയ ടീമിലെത്തി. ചാഡ് ദേശീയ ടീമിനു വേണ്ടി 14 തവണയാണ് കളത്തിലിറങ്ങിയത്.
കേരള ബ്ലാസ്റ്റേഴ്‌സിനു വേണ്ടി ഇന്ത്യന്‍ സൂപ്പര്‍ ലീഗില്‍ കളിക്കാന്‍ സാധിക്കുന്നത് ആവേശമാണ്. ഐ.എസ്.എല്ലിലെ മത്സരങ്ങളുടെ തലം ഇപ്പോള്‍ അന്താരാഷ്ട്ര നിലവാരത്തിനു തുല്യമാണ്. കോച്ച് സ്റ്റീവ് കോപ്പലിനു കീഴില്‍ കളിക്കുന്നതിനു വേണ്ടി കാത്തിരിക്കുകയാണെന്നു അദ്ദേഹം പറഞ്ഞു. അസ്രാക്ക് ഒപ്പമുളളത് കളിക്കളത്തില്‍ കൂടുതല്‍ നേട്ടമാകുമെന്ന് സ്റ്റീവ് കോപ്പല്‍ ചൂണ്ടിക്കാട്ടി.