പെട്രോള്‍ പമ്പുകളില്‍ വഞ്ചിക്കപ്പെടാതിരിക്കാന്‍ ഇക്കാര്യങ്ങള്‍ ശ്രദ്ധിക്കൂ..

ചില പെട്രോള്‍ പമ്പുകളില്‍ തട്ടിപ്പ് നടക്കുന്നതായി ഇടയ്ക്കിടെ വാര്‍ത്തകള്‍ വരാറുണ്ട്.ഇന്ധനം നിറയ്ക്കുമ്പോള്‍ വഞ്ചിക്കപ്പെടാനുള്ള സാധ്യത കൂടുതലാണ്. മീറ്ററിലേക്ക് പോലും നോക്കാതെ ഇന്ധനം നിറച്ച് സ്ഥലം കാലിയാക്കുന്നവരാണ് ഒട്ടുമിക്ക് ആളുകളും. കൊടുത്ത പണത്തിന് തന്നെ അടിച്ചിട്ടുണ്ടോ എന്ന് ചെക്ക് ചെയ്യേണ്ടത് അത്യാവശ്യമാണ്. പമ്പുകളില്‍ നിന്ന് വഞ്ചിക്കപ്പെടാതിരിക്കാന്‍ ഇക്കാര്യങ്ങള്‍ ശ്രദ്ധിക്കൂ...

മീറ്ററിലെ സീറോ നിലവാരം

ഇന്ധനം നിറയ്ക്കാന്‍ തുടങ്ങുന്നതിന് മുമ്പ് മീറ്ററില്‍ പൂജ്യം (Zero Digit) ആണെന്നത് ഉറപ്പാക്കേണ്ടതാണ്. മറ്റൊരാള്‍ ഇന്ധനം നിറച്ചതിനു ശേഷം, മെഷീന്‍ റീസെറ്റ് ചെയ്ത് സീറോ നിലവാരത്തില്‍ ആക്കിയതിനു ശേഷം മാത്രമാണ് നിങ്ങളുടെ വാഹനത്തില്‍ പെട്രോള്‍/ഡീസല്‍ നിറയ്ക്കുന്നതെന്ന് ഉറപ്പു വരുത്തുക. ചില പമ്പുകളില്‍ ഇന്ധനം നിറയ്ക്കുന്നതിന് മുമ്പ് വാഹനത്തില്‍ ഇരിക്കുന്നവരുടെ ശ്രദ്ധ തെറ്റിച്ച സംഭവങ്ങളും ഉണ്ടായിട്ടുണ്ട്. ടയര്‍ പ്രഷര്‍ പരിശോധിക്കാം, ചില രസീതുകളില്‍ ഒപ്പിടാം തുടങ്ങിയ കാര്യങ്ങള്‍ പറഞ്ഞ് ശ്രദ്ധ മാറ്റിയതിനു ശേഷം മേല്‍പറഞ്ഞ വിധം തട്ടിപ്പ് നടത്തിയതായി കണ്ടെത്തിയിട്ടുണ്ട്.

റൗണ്ട് ഫിഗറുകള്‍ ഒഴിവാക്കുക

ചില പമ്പുകളില്‍ ഇപ്പോഴും പഴയ മെഷീനുകളാണ് ഉപയോ?ഗിക്കുന്നത്. ഇത്തരം ചിലയിടങ്ങളില്‍ പൊതുവെ ആളുകള്‍ ഇന്ധനം നിറയ്ക്കുന്ന 100, 200,500 തുകകള്‍ക്ക് ആനുപാതികമായി ഇന്ധനം ലഭിക്കാത്ത വിധമായിരിക്കും സെറ്റിങ്‌സ് നടത്തിയിരിക്കുക. ചെറിയ വ്യത്യാസമാണെങ്കില്‍ പോലും പമ്പുകളെ സംബന്ധിച്ച് ഒരു ദിവസത്തെ മുഴുവന്‍ വോളിയത്തില്‍ ഇത്തരം മാറ്റം വരുന്നത് ലാഭകരമാണ്. അതിനാല്‍ വളരെ റാന്‍ഡമായ തുകകള്‍ക്ക് (ഉദാഹരണം 173 രൂപ) ഇന്ധനം നിറയ്ക്കാന്‍ ശ്രദ്ധിക്കാം.

നല്ല പമ്പുകള്‍ തിരഞ്ഞെടുക്കുക

അറിയുന്ന, വിശ്വാസ്യതയുള്ള പെട്രോള്‍ പമ്പുകള്‍ തെര!ഞ്ഞെടുക്കാവുന്നതാണ്. പുതിയ സ്ഥലങ്ങളില്‍ പോകുമ്പോള്‍ നന്നായി മാനേജ് ചെയ്യുന്നുവെന്ന തോന്നല്‍ നല്‍കുന്ന, ആവശ്യത്തിന് സ്റ്റാഫുള്ള പമ്പുകള്‍ക്ക് മുന്‍ഗണന നല്‍കാം. ഇന്ധനം നിറയ്ക്കുന്ന സമയത്തെ വിലയെക്കുറിച്ചും ധാരണയുണ്ടായിരിക്കണം. ഇന്ധനത്തിന് ബില്‍ ചോദിച്ചു വാങ്ങേണ്ടതും, ഇടയ്ക്കിടെ പമ്പുകള്‍ മാറി ഇന്ധനം നിറയ്ക്കാന്‍ ശ്രദ്ധിക്കാവുന്നതുമാണ്. എന്നാല്‍ ഭൂരിഭാഗം പമ്പുകളിലും തട്ടിപ്പ് നടക്കുന്നില്ല. വിശ്വാസ്യതയോടെ, സത്യസന്ധമായി ബിസിനസ് നടത്തുന്ന പമ്പുകളാണ് അധികവും എന്നതും ഓര്‍മിക്കാം.