തലശ്ശേരി: കണ്ണൂര്‍ സര്‍വോദയ സംഘത്തിന്റെ നേതൃത്വത്തില്‍ ഓണം- ബക്രീദ് ഖാദി-ഗ്രാമ വ്യവസായ എക്‌സിബിഷന്‍ നാളെ മുതല്‍ സെപ്റ്റംബര്‍ 13 വരെ തലശ്ശേരി പുതിയ ബസ് സ്റ്റാന്‍ഡ് പരിസരത്ത് നടക്കുമെന്ന് സെക്രട്ടറി കെ.വി വിജയമോഹനും ബാലന്‍ മാസ്റ്ററും വാര്‍ത്താ സമ്മേളനത്തില്‍ അറിയിച്ചു.
 നാളെ രാവിലെ 10ന് തലശ്ശേരി നഗരസഭാ ചെയര്‍മാന്‍ സി.കെ രമേശന്‍ മേള ഉദ്ഘാടനം ചെയ്യും. മമ്പറം ദിവാകരന്‍ ആദ്യവില്‍പ്പന നിര്‍വഹിക്കും.  ഖാദി ഉല്‍പ്പന്നങ്ങള്‍, മീഡിയം മസ്‌ലിന്‍ സില്‍ക്ക്, പോളി വസ്ത്രം, റെഡിമെയ്ഡുകള്‍, ഉന്നം നിറച്ച കിടക്ക, സോപ്പ്, എണ്ണ, തേന്‍, ആയുര്‍വേദിക് ഉല്‍പ്പന്നങ്ങള്‍, കരകൗശല വസ്തുക്കള്‍ എന്നിവ മേളയില്‍ ലഭ്യമാകും.
ഖാദി തുണിത്തരങ്ങള്‍ക്ക് 30 ശതമാനം സര്‍ക്കാര്‍ റിബേറ്റും പ്രത്യേക സമ്മാന പദ്ധതികളും ഒരുക്കിയതായും സംഘാടകര്‍ അറിയിച്ചു. വാര്‍ത്താ സമ്മേളനത്തില്‍ എ. മോഹനും സംബന്ധിച്ചു.