കയ്പമംഗലം: കാനഡയില്‍ നിന്ന് ആദ്യമായി എഫ്.ആര്‍.സി.പി നേടിയ ഡോ: ശരവണരാജിന്റെ മരണം ഉള്‍ക്കൊള്ളാനാവാതെ തീരദേശം. പെരിഞ്ഞനം കൊച്ചിപ്പറമ്പത്ത് കൃഷ്ണന്‍കുട്ടി  സുഭദ്ര ദമ്പതികളുടെ ഏഴു മക്കളില്‍ ഏഴാമനായിട്ടാണ് ശരവണരാജിന്റെ ജനം. പെരിഞ്ഞനം ആര്‍.എം.വി.എച്ച്.എസ് എസ്‌കൂളില്‍ പ്രാഥമിക വിദ്യഭ്യാസം നേടിയ ശരവണരാജ് തൃശൂര്‍ സെന്റ് തോമസ് കോളജില്‍ നിന്ന് ഇന്റര്‍മീഡയറ്റും മദ്‌റാസ് മെഡിക്കല്‍ കോളജില്‍ നിന്നും എം.ബി.ബി.എസും പാസായി. തുടര്‍ന്ന് 1964ല്‍ അമേരിക്കയില്‍ നിന്ന് എം.ഡിയെടുക്കുകയും കാനഡയില്‍ നിന്ന് എഫ്.ആര്‍.സി.പി. കരസ്ഥമാക്കുകയും ചെയ്തു.
അതുവരെ കാനഡയില്‍ നിന്ന് എഫ്.ആര്‍.സി.പിയെടുത്തത് പഞ്ചാബുകാരനായ ഒരാള്‍ മാത്രമായിരുന്നു. ശ്രീനാരായണ ഗുരുദേവന്റെ വിദ്യകൊണ്ട് പ്രബുദ്ധരാവുക എന്ന സന്ദേശം ഉള്‍ക്കൊണ്ടാണ് പ്രതിസന്ധികളെ തരണം ചെയ്ത് ശരവണരാജ് തന്റെ നേട്ടങ്ങള്‍ കൈപിടിയിലൊതുക്കിയത്.
ഇന്ത്യയില്‍ നിന്ന് അമേരിക്കയില്‍ താമസമാക്കിയ ഡോ: ശരവണരാജിന്റെ മരണം കഴിഞ്ഞ ദിവസം ഫ്‌ളോറഡയിലാണ് സംഭവിച്ചത്. അമേരിക്കയിലെ ശ്രീനാരായണ പ്രസ്ഥാനങ്ങളുടെ അമരക്കാരനായ ഡോക്ടര്‍ നാട്ടില്‍ വന്നാല്‍ എല്ലാവരേയും സഹായിക്കാന്‍ മുന്‍പന്തിയില്‍ തന്നെയുണ്ടാകും. കംപ്യൂട്ടര്‍ പഠനം കേരളത്തില്‍ തുടങ്ങിയതോടെ കേരളത്തിലെ നിരവധി വിദ്യഭ്യാസ സ്ഥാപനങ്ങള്‍ക്കാണ് റീച്ച് ഔട്ട് ഫൗണ്ടേഷന്റെ പേരില്‍ അദ്ദേഹം കംപ്യൂട്ടറുകള്‍ വിതരണം ചെയ്തത്.
വര്‍ഷത്തില്‍ രണ്ടുതവണ നാട്ടില്‍ വരുന്ന ഡോക്ടറെ കുറിച്ച് പറയാന്‍ നാട്ടുകാര്‍ക്കും നിരവധി ഓര്‍മകളാണുള്ളത്. സതിയാണ് ഭാര്യ.  ഡോ: ശരവണരാജിന്റെ നിര്യാണത്തില്‍ പെരിഞ്ഞനം കൊച്ചിപ്പറമ്പത്ത് കുടുംബക്ഷേമ സഭ അനുശോചിച്ചു. അനുശോചന യോഗത്തില്‍ കെ.കെ.ബാബുരാജന്‍, കെ.കെ.ദാമോദരന്‍, കെ.കെ.ഗോപിനാഥന്‍ തുടങ്ങിയവര്‍ സംസാരിച്ചു.