എന്‍.സി ഷെരീഫ്

മഞ്ചേരി: അമ്മയും മകനും ഒരുമിച്ച് പഠിച്ചു. സര്‍ക്കാര്‍ സര്‍വീസിലേക്കുള്ള പടികയറുന്നതും ഇവര്‍ ഒന്നിച്ച്. അരീക്കോട് സൗത്ത് പുത്തലം കറുത്തചോല ഓട്ടുപാറ വീട്ടിലാണ് ഈ അപൂര്‍വ നേട്ടം. പി.എസ്.സി റാങ്ക് പട്ടിക പ്രസിദ്ധീകരിച്ചപ്പോള്‍ ലക്ഷക്കണക്കിന് പേരുകളില്‍ പത്തരമാറ്റ് തിളക്കമായത് ഒരു അമ്മയുടെയും മകന്റെയും വീറും വാശിയും പരസ്പര സഹകരണവും നിറഞ്ഞ പഠനസമയങ്ങള്‍ തന്നെ. അമ്മ ബിന്ദു ലാസ്റ്റ് ഗ്രേഡ് സര്‍വന്റ് പട്ടികയില്‍ 92ാംകാരിയാണ്. ഒരു പടികൂടി മുന്നേറി മകന്‍ വിവേകിന് എല്‍.ഡി ക്ലര്‍ക്ക് പട്ടികയില്‍ 38ാം റാങ്ക് നേടാനായി. റാങ്ക് ലിസ്റ്റിലെ ഇടങ്ങള്‍ക്കപ്പുറം ഒരു അമ്മയും മകനും പരസ്പരം മത്സരിച്ച് നേടിയ വിജയമാണിത്. അത് കൊണ്ട് തന്നെയാണ് ഇരുവര്‍ക്കും സ്വന്തം നേട്ടത്തേക്കാള്‍ പരസ്പരം മാധുര്യം തോന്നുന്നതും.

സ്വകാര്യ സ്ഥാപനത്തില്‍ ഇരുവരും ഒരുമിച്ചാണ് പരിശീലന ക്ലാസിലെത്തുക. തിരിച്ച് വീട്ടിലെത്തിയാല്‍ പിന്നെ സംശയ ദൂരികരണവും പരസ്പരം ചോദ്യമെറിഞ്ഞും പരിശീലനക്കളരി തുടരും. അമ്മയും മകനും വിദ്യാര്‍ഥിയും അധ്യാപകനുമായി പരീക്ഷയും സമ്മാനദാനവും രണ്ട് പേര്‍ മാത്രമാകുന്ന അനുമോദന ചടങ്ങും.

ജയപരാജയങ്ങള്‍ അറിഞ്ഞുള്ള കഠിനപരിശ്രമം. ഈ സ്‌നേഹവും ചേര്‍ത്തുനിര്‍ത്തലും തന്നെയാണ് ഇരുവരുടേയും നേട്ടങ്ങള്‍ക്ക് തിളക്കമേറ്റുന്നതും. 41 കാരിയായ ബിന്ദുവിന് അവസാനത്തെ അവസരത്തിലാണ് ആദ്യ 100 പട്ടികയില്‍ ഇടം നേടാനായത്. 2014 മുതല്‍ ശ്രമം നടത്തുന്നുണ്ട്. 2017 ല്‍ 684ാം റാങ്ക് നേടി. ഇതില്‍ 683 പേരും നിയമനം നേടിയപ്പോഴും ബിന്ദുവിന് ഒട്ടും നിരാശ തോന്നിയില്ല. കൂടുതല്‍ മുന്നേറാനുള്ള പ്രചോദനമായിരുന്നു അത്.

നിശ്ചയദാര്‍ഢ്യത്തോടെ പഠനവഴിയില്‍ ഉറച്ചുനില്‍ക്കാന്‍ വിവേക് സഹായിയായി മാറി. തിരിച്ച് മകന് അധ്യാപികയായി അമ്മയും. 2019ലാണ് വിവേക് പി.എസ്.സി പരീക്ഷ എഴുതിയത്. നാലാമത്തെ ശ്രമത്തിലാണ് 38ാം റാങ്ക് നേടിയത്. നേട്ടത്തെ കുറിച്ച് ചോദിച്ചാല്‍ അമ്മയ്ക്ക് റാങ്ക് നേടാനായല്ലോയെന്ന് വിവേകും മകന്റെ വിജയത്തില്‍ സന്തോഷിക്കുന്നെന്ന് ബിന്ദുവും പറയും.

അരീക്കോട് മാതക്കോട് അങ്കണവാടിയില്‍ ടീച്ചറായ ബിന്ദുവിന് 2019ല്‍ മികച്ച അങ്കണവാടി ടീച്ചര്‍ക്കുള്ള പുരസ്‌കാരം ലഭിച്ചിരുന്നു. 'നന്നായി പഠിച്ചെങ്കിലും ഇത്രയൊന്നും പ്രതീക്ഷിച്ചതല്ല, ദൈവം നല്‍കിയ അനുഗ്രഹമാണ്', അമ്മയ്ക്കും മകനും ആനന്ദക്കണ്ണീര്‍. ബിന്ദുവിന്റെ ഭര്‍ത്താവ് ചന്ദ്രന്‍ കെ.എസ്.ആര്‍.ടി.സി എടപ്പാള്‍ ഡിപ്പോയില്‍ മെക്കാനിക്കാണ്. വീട്ടിലെ ഇളയവള്‍ ഹൃദ്യ പെരിന്തല്‍മണ്ണ പോളിടെക്‌നിക് കോളജ് വിദ്യാര്‍ഥിയാണ്.