ദുബൈ: വിമാനക്കമ്പനികളുടെ പകല്‍ക്കൊള്ളയെ നേരിടാന്‍ യാത്രക്കാര്‍ പുതുവഴി തേടുന്നു. അവധി കഴിഞ്ഞ് നാട്ടില്‍ നിന്നും യു.എ.ഇലേക്ക് തിരിക്കുന്ന പ്രവാസികളാണ് വിമാനടിക്കറ്റ് വിലയുടെ കുത്തനെയുള്ള കയറ്റത്തെ പ്രതിരോധിക്കാന്‍ പുതിയ യാത്രാമാര്‍ഗങ്ങള്‍ പരീക്ഷിക്കുന്നത്. ഇന്ത്യയില്‍ നിന്ന് യു.എ.ഇയിലെത്താന്‍ ഒമാന്‍ ഉള്‍പ്പെടെയുള്ള മറ്റ് ജി.സി.സി രാജ്യങ്ങളെ ആശ്രയിക്കുകയാണിവര്‍.ഭൂരിഭാഗം പേരും ഒമാന്‍ വഴി യു.എ.ഇയിലെത്താനാണ് ശ്രമിക്കുന്നത്. കേരളത്തിലെ വിമാനത്താവളങ്ങളില്‍ നിന്ന് യു.എ.ഇയിലേക്കുള്ള നിരക്കിന്റെ പകുതി തുകയ്ക്ക് ഒമാനിലേക്ക് ടിക്കറ്റുകള്‍ ലഭിക്കും. ഒമാന്‍ വഴിയുള്ള യാത്രയ്ക്ക് വിമാന ടിക്കറ്റ് നിരക്കിന് പുറമെ ഒമാന്‍ സന്ദര്‍ശക വിസയും ആവശ്യമാണ്. കൊച്ചിയില്‍ നിന്ന് മസ്‌കറ്റിലേക്ക് 600-700 ദിര്‍ഹം ആണ് ടിക്കറ്റ് നിരക്ക്. ഒമാനിലെ ഓണ്‍ അറൈവല്‍ വിസയെടുത്ത് ബസിന് ദുബൈയില്‍ എത്തിയാല്‍ പോലും ചെലവ് കുറവാണ്.യു.എ.ഇ വിസയുള്ളവര്‍ക്ക് ഒമാനിലെ ഓണ്‍ അറൈവല്‍ വിസ 60 ദിര്‍ഹത്തില്‍ താഴെ ലഭിക്കും. നിലവില്‍ കൊച്ചിയില്‍ നിന്ന് ദുബൈയിലേക്ക് നേരിട്ടുള്ള വിമാനങ്ങള്‍ക്ക് 1500 ദിര്‍ഹം മുതലാണ് നിരക്ക്. താഴ്ന്ന വരുമാനമുള്ള പ്രവാസികള്‍ പലരും ഒമാന്‍ വഴി എത്താനാണ് ശ്രമിക്കുന്നത്.