തുറമുഖ കവാടത്തിന്റെ പൂട്ട് പൊളിച്ച് അകത്തുകടന്ന് കൊടിനാട്ടി
തിരുവനന്തപുരം • വിഴിഞ്ഞം തുറമുഖത്തിനെതിരായ പ്രതിഷേധസമരം അഞ്ചാംദിവസവും തുടർന്ന് മത്സ്യത്തൊഴിലാളികൾ. സമരക്കാർ തുറമുഖ കവാടത്തിന്റെ പൂട്ട് പൊളിച്ച് ഇന്നലെയും അകത്തുകടന്ന് കൊടിനാട്ടി. നൂറുകണക്കിന് തീരദേശവാസികളാണ് സമരത്തിൽ അണിനിരന്നത്. ലത്തീൻ അതിരൂപതയുടെ നേതൃത്വത്തിൽ നടക്കുന്ന സമരത്തിന് കൂടുതൽ സംഘടനകൾ പിന്തുണയുമായി രംഗത്തെത്തിയിട്ടുണ്ട്.
കഴിഞ്ഞ ദിവസം നടന്ന മന്ത്രിതല ചർച്ചയ്ക്കു ശേഷവും സമരവുമായി മുന്നോട്ടുപോകാനായിരുന്നു തീരുമാനം. ചർച്ച ഫലപ്രദമാണെന്നും നേതാക്കൾ അറിയിച്ചിരുന്നു. മന്ത്രിമാരായ വി.അബ്ദുറഹിമാനും ആന്റണിരാജുവും സമരം അവസാനിപ്പിക്കുന്നതുമായി ബന്ധപ്പെട്ട് നടത്തിയ യോഗത്തിൽ സമവായ നീക്കങ്ങളുണ്ടായെങ്കിലും തുറമുഖ നിർമാണം നിർത്തിവയ്ക്കണമെന്ന ആവശ്യത്തിൽ ഉറച്ചുനിൽക്കുകയാണ് സമരസമിതി. തുറമുഖ നിർമാണം നിർത്തിയുള്ള ആഘാത പഠനത്തിലും മണ്ണെണ്ണ സബ്‌സിഡി വിഷയത്തിലും അടുത്തയാഴ്ച മുഖ്യമന്ത്രിയുമായി ചർച്ച നടത്തും. ഇതിനു ശേഷമായിരിക്കും സമരം അവസാനിപ്പിക്കുന്നതടക്കമുള്ള കാര്യങ്ങൾ തീരുമാനിക്കുക. ക്യാംപിലുള്ളവരെ വാടക വീടുകളിലേക്കും പിന്നീട് സ്ഥിരം പുനരധിവാസ കേന്ദ്രത്തിലേക്കും മാറ്റിപ്പാർപ്പിക്കാനായിരുന്നു മന്ത്രിതല ചർച്ചയിലെ ധാരണ. ഇത് നടപ്പായാൽ പ്രതിഷേധം ശമിപ്പിക്കാനാവുമെന്നാണ് സർക്കാരിന്റെ കണക്കുകൂട്ടൽ. സമരസമിതിയുടെ ആവശ്യങ്ങൾ പടിപടിയായി നിറവേറ്റി സമരം തണുപ്പിച്ച ശേഷം തുറമുഖ നിർമാണവുമായി ബന്ധപ്പെട്ട കാര്യങ്ങളിൽ തീരുമാനമെടുക്കാനാണ് സർക്കാർ നീക്കം.