ലഖ്‌നൗ • ഉത്തർപ്രദേശിലെ ഷാജഹാൻപൂരിൽ അയൽവാസിയുടെ വീട്ടിൽനിന്ന് പിടികൂടിയ പാമ്പിനെ മറ്റുള്ളവർക്കു മുന്നിൽ പ്രദർശിപ്പിക്കുന്നതിനിടെ പാമ്പു പിടിത്തക്കാരൻ കടിയേറ്റ് മരിച്ചു. മറുവാ ജാല ഗ്രാമത്തിലെ മുൻ ഗ്രാമത്തലവൻ കൂടിയായ ദേവേന്ദ്ര മിശ്രയാണ് മരിച്ചത്.
പിടിച്ച പാമ്പിനെ കഴുത്തിൽച്ചുറ്റി പ്രദേശവാസികൾക്കു മുമ്പിൽ പ്രദർശിപ്പിക്കുകയും വിഡിയോ ചിത്രീകരിക്കുകയും ചെയ്യുന്നതിനിടെയാണ് മിശ്രയ്ക്ക് കടിയേറ്റത്. പാമ്പിനെ ഇയാൾ പിഞ്ചുകുട്ടിയുടെ കഴുത്തിൽ ചുറ്റുകയും ചെയ്തിരുന്നു.

കടിയേറ്റ് രണ്ടുമണിക്കൂറിനുള്ളിൽ തന്നെ അദ്ദേഹം മരിച്ചു. കടിയേറ്റ മിശ്രയെ ആശുപത്രിയിൽ എത്തിക്കാൻ നാട്ടുകാർ ശ്രമിച്ചെങ്കിലും അതിനെ അദ്ദേഹം എതിർത്തു. മുറിവിൽ പച്ചമരുന്നുകൾ തേച്ചുപിടിപ്പിച്ചാൽ മതിയെന്നായിരുന്നു അദ്ദേഹം പറഞ്ഞത്.