പ്രത്യേക ലേഖകൻ
തിരുവനന്തപുരം • തദ്ദേശ മന്ത്രിയായ എം.വി ഗോവിന്ദൻ പർട്ടി സംസ്ഥാന സെക്രട്ടറിയായതോടെ മന്ത്രിസഭാ പുനഃസംഘടനയ്ക്ക് കളമൊരുങ്ങി. സജി ചെറിയാൻ, എം.വി ഗോവിന്ദൻ എന്നിവർക്ക് പകരമായി രണ്ട് മന്ത്രിമാർ പുതിയതായി വന്നേക്കും. തദ്ദേശ സ്വയംഭരണ, എക്‌സൈസ് വകുപ്പിലേക്കും സാംസ്‌ക്കാരിക, ഫിഷറീസ് വകുപ്പിലേക്കുമാണ് പുതിയ മന്ത്രിമാരെത്തുക. വിഷയത്തിൽ തീരുമാനമെടുക്കാൻ സി.പി.എം 15 അംഗ സംസ്ഥാന സെക്രട്ടേറിയറ്റിനെ ചുമതലപ്പെടുത്തി. ഓണത്തിനുമുമ്പ് ഇക്കാര്യത്തിൽ തീരുമാനമുണ്ടായേക്കും.
രണ്ടാം പിണറായി സർക്കാരിലെ മന്ത്രിമാരുടെ പ്രകടനം പോരായെന്ന വിലയിരുത്തലാണ് പാർട്ടിക്കുള്ളത്.

മന്ത്രിമാരായി പുതുമുഖങ്ങളെ കൊണ്ടുവരണോ, ഒന്നാം പിണറായി സർക്കാരിലെ ജനകീയമുഖങ്ങളെ കൊണ്ടുവരണോ എന്നത് അടുത്ത വെള്ളിയാഴ്ച ചേരുന്ന സെക്രട്ടേറിയറ്റാകും തീരുമാനിക്കുക. കെ.കെ ശൈലജയെ മന്ത്രിസഭയിലേക്ക് കൊണ്ടുവരുമെന്ന അഭ്യൂഹമുണ്ടെങ്കിലും സാധ്യത കുറവെന്നാണ് സൂചന. തുടർഭരണം ലഭിച്ചപ്പോൾ ഒന്നാം പിണറായി സർക്കാരിലെ മന്ത്രിമാർ തുടരേണ്ടെന്നായിരുന്നു പാർട്ടി തീരുമാനം.

ആരോഗ്യമന്ത്രിയായ വീണാ ജോർജിനെ സ്പീക്കറാക്കി എം.ബി രാജേഷിനെ തദ്ദേശ, എക്‌സൈസ് മന്ത്രിയാക്കാനും ആലോചനയുണ്ട്. കൂടാതെ പി.പി ചിത്തരഞ്ജൻ, എ.എൻ ഷംസീർ എന്നിവരെയും മന്ത്രിസഭയിലേക്ക് പരിഗണിച്ചേക്കും.
ഗോവിന്ദന് മാത്രം പകരക്കാരൻ മതിയെന്നാണ് തീരുമാനമെങ്കിൽ കണ്ണൂരിൽ നിന്നുള്ള ഷംസീർ മന്ത്രിസഭയിലെത്തിയേക്കും.