ന്യൂഡല്‍ഹി: ഉദ്ധവ് താക്കറെ കാമ്പില്‍ നിന്നും കൂടുതല്‍ എം.എല്‍.എമാര്‍ ഷിന്‍ഡെ പ!ക്ഷത്തേക്ക് മാറുമെന്ന് റിപ്പോര്‍ട്ടുകള്‍. ഉദ്ധവ് താക്കറെ വിഭാഗത്തില്‍നിന്നുള്ള രണ്ടോ മൂന്നോ എം.എല്‍.എമാര്‍ മുഖ്യമന്ത്രി ഏകനാഥ് ഷിന്‍ഡെയുടെ ഗ്രൂപ്പില്‍ ചേരുമെന്ന് പ്രതീക്ഷിക്കുന്നതായി മഹാരാഷ്ട്ര മന്ത്രി സന്ദീപന്‍ ബുംമ്ര സ്വകാര്യ ചാനലിനോട് വെളിപ്പെടുത്തി. ജില്ലയുടെ ചുമതലയുള്ള ശിവസേനയുടെ ഭൂരിഭാഗം നേതാക്കളും ഷിന്‍ഡെ വിഭാഗവുമായി സമ്പര്‍ക്കം പുലര്‍ത്തുന്നുണ്ടെന്നും അദ്ദേഹം അവകാശപ്പെട്ടു.

എന്നാല്‍ എം.എല്‍.എമാരുടെ പേരുകള്‍ പറയാന്‍ അദ്ദേഹം തയാറായില്ല. 'പേരുകള്‍ പരാമര്‍ശിക്കുന്നില്ല, പക്ഷെ ഇവര്‍ കൊങ്കണ്‍, മറാത്താവാഡ എന്നിവിടങ്ങളില്‍ നിന്നുള്ളവരാണെന്ന് മാത്രം പറയാം.' സന്ദീപന്‍ ബുംമ്രെ പറഞ്ഞു.

ഏക്‌നാഥ് ഷിന്‍ഡെയുടെ നേതൃത്വത്തില്‍ നടന്ന വിമത നീക്കത്തെതുടര്‍ന്ന് ജൂണ്‍ 29നാണ് ഉദ്ധവ് താക്കറെ മുഖ്യമന്ത്രി സ്ഥാനത്തുനിന്നു രാജിവെച്ചത്. ഇതോടെ രണ്ടുവര്‍ഷവും 213 ദിവസവും നീണ്ട മഹാരാഷ്ട്രയിലെ മഹാവികാസ് അഘാഡി ഭരണത്തിന് അന്ത്യമായി. തുടര്‍ന്ന് ശിവസേന വിമത നേതാവ് ഏക്‌നാഥ് ഷിന്‍ഡെ മഹാരാഷ്ട്ര മുഖ്യമന്ത്രിയായും ബി.ജെ.പി നേതാവും മുന്‍ മുഖ്യമന്ത്രിയുമായ ദേവേന്ദ്ര ഫഡ്‌നാവിസ് ഉപമുഖ്യമന്ത്രിയായും സത്യപ്രതിജ്ഞ ചെയ്ത് അധികാരമേല്‍ക്കുകയായിരുന്നു.