സ്വന്തം ലേഖകന്‍
തിരുവനന്തപുരം: സംസ്ഥാനത്ത് ലൗ ജിഹാദില്ലെന്ന് ഇന്ന് സ്ഥാനമൊഴിയുന്ന സംസ്ഥാന പൊലിസ് മേധാവി ലോക്‌നാഥ് ബെഹ്‌റ. മതേതര സമൂഹമുള്ള കേരളത്തില്‍ കാലങ്ങളായി വിവിധ മതവിഭാഗങ്ങളിലുള്ളവര്‍ പരസ്പരം വിവാഹം ചെയ്യുന്നുണ്ട്. അതിന്റെ പേരില്‍ ദുരഭിമാനക്കൊല പോലുള്ളവ നടക്കുന്നില്ലെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.
ഇത്തരത്തിലുള്ള വിവാഹങ്ങളെയെല്ലാം ഭീകരവാദത്തിന് ഉപയോഗിക്കുന്നു എന്ന ആരോപണം ശരിയല്ല. അതുകൊണ്ടുതന്നെ അതിന് ലൗ ജിഹാദ് എന്ന വാക്കുപയോഗിക്കാനാവില്ല. ഏറെ രാഷ്ട്രീയവല്‍കരിച്ച പദമാണ് ലൗ ജിഹാദ്.
പ്രണയം നടിച്ച് ഭീകരവാദത്തിലേക്ക് നയിക്കുന്ന ഒന്നോ രണ്ടോ സംഭവമുണ്ടായിട്ടുണ്ട്. അതില്‍ ഇടപെടുകയും കൗണ്‍സിലിങ്ങുകളടക്കം നിരവധി നടപടികള്‍ സ്വീകരിച്ച് ഇല്ലായ്മ ചെയ്യുകയുമുണ്ടായി. മാവോയിസ്റ്റ് വേട്ടയില്‍ കുറ്റബോധമില്ല. നിയമമനുസരിച്ചാണ് ഇക്കാര്യത്തില്‍ പ്രവര്‍ത്തിച്ചത്. മാവോയിസ്റ്റ് വേട്ടയ്ക്കിടെ ഒരു പൊലിസുകാരന്‍ കൊല്ലപ്പെട്ടിരുന്നെങ്കില്‍ ഇപ്പോഴെത്തെ വിമര്‍ശകര്‍ എന്തുപറയുമായിരുന്നു എന്ന് അദ്ദഹം ചോദിച്ചു.

'തീവ്രവാദ പ്രവര്‍ത്തനം മുന്‍കൂട്ടി അറിയാന്‍ താന്‍ ദൈവമല്ല'

തിരുവനന്തപുരം: തീവ്രവാദ പ്രവര്‍ത്തനങ്ങള്‍ മുന്‍കൂട്ടി അറിയാന്‍ താന്‍ ദൈവമല്ലെന്ന് ഡി.ജി.പി ലോക്‌നാഥ് ബെഹ്‌റ. തീവ്രവാദ പ്രവര്‍ത്തനം മുന്‍കൂട്ടി അറിയുന്നതില്‍ ഇന്റലിജന്‍സ് വിഭാഗത്തിന് വീഴ്ചയുണ്ടായോ എന്ന ചോദ്യത്തിനായിരുന്നു ബെഹ്‌റയുടെ വിചിത്ര മറുപടി.
ഇന്ത്യയില്‍ ഭീകരവാദം വളര്‍ത്താന്‍ അയല്‍രാജ്യങ്ങള്‍ നിരന്തരം ശ്രമിക്കുന്നുണ്ട്. കേരളം ഇന്ത്യയ്ക്കകത്തായതിനാല്‍ ആര്‍ക്കും ഭീകരവാദം ഇല്ലായ്മ ചെയ്യാനാകില്ല. ഒരിക്കലും തീവ്രവാദം പൂര്‍ണമായും ഇല്ലായ്മ ചെയ്യാനാകില്ല. ഇന്റലിജന്‍സ് ഉണ്ടെങ്കിലും അവരും ദൈവമല്ല. 100 ശതമാനം വിജയിക്കാന്‍ ആര്‍ക്കുമാവില്ല.
കേരളം ഭീകരസംഘടനകളുടെ റിക്രൂട്ടിങ് ലക്ഷ്യമായി മാറുന്നു എന്ന തന്റെ പ്രസ്താവന തെറ്റിദ്ധരിക്കപ്പെട്ടതാണ്.
സാധാരണക്കാരെ വലയിലാക്കാന്‍ പാടാണെന്നതിനാല്‍ ഭീകരര്‍ വിദ്യാസമ്പന്നരെയാണ് ലക്ഷ്യമിടുന്നത്. നിലവില്‍ കേരളം സുരക്ഷിതമാണെന്നും അദ്ദേഹം പറഞ്ഞു.