മഞ്ചേശ്വരം: മൂന്ന് കിലോയോളം കഞ്ചാവുമായി കാസര്‍കോട് സ്വദേശി പിടിയിലായി. മംഗളൂരുവില്‍നിന്നും കാസര്‍കോട്ടേക്ക് വരികയായിരുന്ന കര്‍ണാടക ആര്‍.ടി.സി ബസില്‍ കഞ്ചാവുമായി യാത്ര ചെയ്യുന്നതിനിടെയാണ് കാസര്‍കോട് ചൗക്കി സ്വദേശിയായ അഹമ്മദ് (44) പിടിയിലായത്.  
രഹസ്യ വിവരത്തെതുടര്‍ന്ന് മഞ്ചേശ്വരം എക്‌സൈസ് സംഘം ബസില്‍ നടത്തിയ പരിശോധനയിലാണ് കഞ്ചാവ് കണ്ടെത്തിയത്. ബസിന്റെ പിറകുവശത്തെ സീറ്റിനടിയില്‍ പ്ലാസ്റ്റിക് കവറിലാക്കി സൂക്ഷിച്ചുവച്ച നിലയിലായിരുന്നു മൂന്ന് കിലോയോളം വരുന്ന കഞ്ചാവ്.
കര്‍ണാടകയില്‍നിന്ന് കാസര്‍കോട് ഭാഗത്തേക്ക് വ്യാപകമായി കഞ്ചാവ് കടത്തുന്നുണ്ടെന്ന വിവരത്തെത്തുടര്‍ന്ന് പൊലിസും, എക്‌സൈസ് സംഘവും പരിശോധന ശക്തമാക്കിയിരിക്കുകയാണ്.
എക്‌സൈസ് ഇന്‍സ്‌പെക്ടര്‍ എന്‍. ശങ്കരന്‍, അസി. ഇന്‍സ്‌പെക്ടര്‍ റജിമോന്‍, സിവില്‍ എക്‌സൈസ് ഓഫിസര്‍മാരായ മഞ്ചുനാഥ ആള്‍വ, സുജിത്, ടി.കെ. കുമാര്‍, രാജീവ് എന്നിവരുടെ നേതൃത്വത്തിലായിരുന്നു പരിശോധന.