അതിര്‍ത്തിയില്‍ പാകിസ്താന്‍ ഡ്രോണ്‍ ബി.എസ്.എഫ് വെടിവച്ചു തുരത്തി

ജമ്മു: പുല്‍വാമയിലുണ്ടായ ഏറ്റുമുട്ടലില്‍ അഞ്ച് ലഷ്‌കറെ ത്വയ്ബ ഭീകരര്‍ കൊല്ലപ്പെട്ടു. ഏറ്റുമുട്ടലില്‍ ഒരു ജവാനും വീരമൃത്യു വരിച്ചു. രാജ്‌പോരയ്ക്കടുത്തുള്ള ഹാന്‍ജിന്‍ ഗ്രാമത്തിലാണ് ഏറ്റുമുട്ടലുണ്ടായത്.
ഭീകരര്‍ ഒളിവില്‍ക്കഴിയുന്നുവെന്ന രഹസ്യവിവരത്തിന്റെ അടിസ്ഥാനത്തില്‍ വ്യാഴാഴ്ച രാത്രി സുരക്ഷാസേനയും പൊലിസും നടത്തിയ പരിശോധനയ്ക്ക് പിന്നാലെയാണ് ഏറ്റുമുട്ടല്‍. ഭീകരര്‍ സൈനികര്‍ക്ക് നേരെ വെടിവച്ചതിനാലാണ് ഏറ്റുമുട്ടലുണ്ടായതെന്ന് പൊലിസ് വ്യക്തമാക്കി. ഏറ്റുമുട്ടലില്‍ പരുക്കേറ്റ സൈനികന്‍ പിന്നീട് ആശുപത്രിയിലാണ് മരിച്ചത്. കഴിഞ്ഞ ആറുമാസത്തിനുള്ളില്‍ സുരക്ഷാസേനയുമായുള്ള ഏറ്റുമുട്ടലില്‍ 61 ഭീകരര്‍ കൊല്ലപ്പെട്ടിരുന്നു.കൊല്ലപ്പെട്ട ഭീകരരിലൊരാള്‍ ലഷ്‌ക്കര്‍ പുല്‍വാമ ജില്ലാ കമാന്‍ഡര്‍ നിഷാസ് ലോണും മറ്റൊരാള്‍ പാകിസ്ഥാന്‍ സ്വദേശിയുമാണ്.
അതിനിടെ ജമ്മുകശ്മിരിലെ അന്താരാഷ്ട്ര അതിര്‍ത്തിയില്‍ ഇന്ത്യന്‍ ഭാഗത്ത് പ്രത്യക്ഷപ്പെട്ട പാകിസ്താന്റെ നിരീക്ഷണ ഡ്രോണിനെ ബി.എസ്.എഫ് വെടിവച്ചു തുരത്തി. വെള്ളിയാഴ്ച പുലര്‍ച്ചെ 4.25ന് അര്‍നിയ മേഖലയിലെ ജാബോവാലിലാണ് പാകിസ്താന്റെ നിരീക്ഷണ ഡ്രോണ്‍ പ്രത്യക്ഷപ്പെട്ടത്. സൈന്യം വെടിയുതിര്‍ത്തതോടെ ഡ്രോണ്‍ തിരിച്ചു പറക്കുകയായിരുന്നുവെന്ന് ബി.എസ്.എഫ് അറിയിച്ചു. ജമ്മു വ്യോമസേനാ വിമാനത്താവളത്തിലുണ്ടായ ഡ്രോണ്‍ ആക്രമണത്തിനു പിന്നാലെ ജമ്മു മേഖലയില്‍ സംശയകരമായ സാഹചര്യത്തില്‍ ഡ്രോണുകള്‍ പ്രത്യക്ഷപ്പെടുന്നത് പതിവായിരുന്നു. ഇതെത്തുടര്‍ന്ന് സൈന്യം അതീവ ജാഗ്രതയിലാണ്.