തിരുവനന്തപുരം: കൊവിഡ് കാരണം നിര്‍ത്തിവച്ചിരുന്ന തിരുവനന്തപുരം- ബംഗളൂരു സര്‍വിസ് കെ.എസ്.ആര്‍.ടി.സി പുനരാരംഭിച്ചു. കൊവിഡ് മാനദണ്ഡങ്ങളില്‍ ഇളവ് വന്ന സാഹചര്യത്തില്‍ ഇരു സംസ്ഥാനങ്ങളും സര്‍വിസുകള്‍ ആരംഭിക്കാന്‍ തീരുമാനിച്ചതിന്റെ അടിസ്ഥാനത്തിലാണിത്.

ഏപ്രില്‍ ഒന്‍പതിന് നിര്‍ത്തിവച്ച സര്‍വിസാണ് പുനരാരംഭിച്ചത്. തിരുവനന്തപുരത്തു നിന്ന് ഞായറാഴ്ച വൈകിട്ട് അഞ്ചു മണിക്ക് പുറപ്പെട്ട ആദ്യ സര്‍വിസില്‍ മുഴുവന്‍ സീറ്റുകളും നിറഞ്ഞിരുന്നു. അതേസമയം അന്തര്‍ സംസ്ഥാന ഗതാഗതത്തിന് തമിഴ്‌നാട് സര്‍ക്കാര്‍ ഇതുവരെ അനുമതി നല്‍കിയിട്ടില്ല. അതുകൂടി ലഭിച്ചാല്‍ പാലക്കാട് സേലം വഴിയുള്ള ബംഗളൂരു സര്‍വിസും ആരംഭിക്കാനാകും.

ഇതിന് ആദ്യഘട്ടമെന്ന നിലയില്‍ തമിഴ്‌നാട്ടിലേക്ക് സര്‍ക്കാര്‍ ഉദ്യോഗസ്ഥര്‍ക്കുള്ള ബോണ്ട് സര്‍വിസ് നടത്താന്‍ കോയമ്പത്തൂര്‍ കലക്ടര്‍ അനുമതി നല്‍കി. ഇതിന്റെ അടിസ്ഥാനത്തില്‍ പാലക്കാട് - കോയമ്പത്തൂര്‍ ബോണ്ട് സര്‍വിസുകള്‍ തിങ്കളാഴ്ച ആരംഭിക്കും.

ദീര്‍ഘ ദൂര ബസുകളുടെ സമയ വിവരവും ബുക്കിങും വെബ്‌സൈറ്റിലും മൊബൈല്‍ ആപ്പിലും ലഭ്യമാക്കിയിട്ടുണ്ടെന്ന് അധികൃതര്‍ അറിയിച്ചു.