പോര്‍ട്ട് ഓഫ് പ്രിന്‍സ്: ഹെയ്ത്തി പ്രസിഡന്റിനെ വെടിവച്ചു കൊന്ന സംഭവത്തിനു ശേഷം ഇതാദ്യമായി ചികില്‍സയിലുള്ള അദ്ദേഹത്തിന്റെ പത്‌നി മാര്‍ട്ടിന സംസാരിച്ചു.
ജുവിനല്‍ മുയിസിന് വാ തുറക്കാന്‍ അവസരം നല്‍കാതെ കൊലയാളികള്‍ തുരുതുരാ വെടിവയ്ക്കുകയായിരുന്നുവെന്ന് അവര്‍ ട്വിറ്ററിലൂടെ പറഞ്ഞു.ജൂലൈ ഏഴിന് അര്‍ധരാത്രി പ്രസിഡന്റിന്റെ വസതിയില്‍ അതിക്രമിച്ചു കടന്നായിരുന്നു ആക്രമണം. വെടിവയ്പില്‍ സാരമായി പരുക്കേറ്റ മാര്‍ട്ടിന മിയാമിയിലെ ആശുപത്രിയില്‍ ചികില്‍സയിലായിരുന്നു.
കണ്ണടച്ച് തുറക്കുന്നതിനു മുന്‍പ് കൊലയാളികള്‍ തന്റെ ഭര്‍ത്താവിനെ വെടിയുണ്ടകള്‍ കൊണ്ട് മൂടി.
ഒരു വാക്ക് സംസാരിക്കാന്‍ പോലും അനുവദിക്കാതെ അദ്ദേഹത്തെ കൊലപ്പെടുത്തിയ ഹീനകൃത്യത്തെ വിശേഷിപ്പിക്കാന്‍ വാക്കുകളില്ല. എനിക്കു കരച്ചില്‍ മാറിയിട്ടില്ല. എന്നാല്‍ രാജ്യത്തെ പാതിവഴിയില്‍ ഉപേക്ഷിക്കാനാവില്ല. മുയിസിന്റെ രക്തം ചിന്തിയത് വെറുതെയായിക്കൂടെന്നും അവര്‍ പറഞ്ഞു.