മംഗളൂരു: പാകിസ്താന്‍ നരകമല്ലെന്ന പരാമര്‍ശത്തിനു പിന്നാലെ നടിയും എം.പിയുമായ രമ്യയ്ക്കു നേരെ ചീമുട്ടയേറ്. മംഗളൂരു വിമാനത്താവളത്തില്‍ വച്ചാണ് രമ്യയ്ക്കു നേരെ മുട്ടയേറുണ്ടായത്.

പാകിസ്താനില്‍ പോകുന്നത് നരകത്തില്‍ പോകുന്നതിനു തുല്യമാണെന്ന പ്രതിരോധ മന്ത്രി മനോഹര്‍ പരീക്കറിന്റെ പ്രസ്താവനയെ വിമര്‍ശിച്ചാണ് നടി രംഗത്തെത്തിയിരുന്നത്. സാര്‍ക്ക് രാജ്യങ്ങളിലെ യുവ എം.പിമാരുടെ യോഗത്തില്‍ പങ്കെടുക്കാന്‍ പാകിസ്താനില്‍ പോയി മടങ്ങിവന്നായിരുന്നു രമ്യയുടെ പ്രതികരണം. കര്‍ണാടകത്തിലെ മാണ്ഡ്യയില്‍നിന്നുള്ള കോണ്‍ഗ്രസ് പ്രതിനിധിയാണ് ദിവ്യസ്പന്ദന എന്ന രമ്യ.