ബാരാബങ്കി: ഹൈദരാബാദ് സര്‍വകലാശാലയില്‍ ആത്മഹത്യ ചെയ്ത ഗവേഷക വിദ്യാര്‍ഥി രോഹിത് വെമുല ദലിത് വിഭാഗത്തില്‍ പെടുന്നയാളല്ലെന്ന രൂപന്‍വാള്‍ കമ്മിഷന്‍ റിപ്പോര്‍ട്ട് ദേശീയ പട്ടികജാതി കമ്മിഷന്‍ തള്ളി. രോഹിത് ദലിതന്‍ തന്നെയാണെന്ന് എന്‍.സി.എസ്.സി ചെയര്‍മാനും കോണ്‍ഗ്രസിന്റെ രാജ്യസഭാ എം.പിയുമായ പി.എല്‍ പുനിയ പറഞ്ഞു.

രോഹിത് ഒ.ബി.സി വിഭാഗത്തില്‍പ്പെടുന്നയാളല്ലെന്നും പട്ടികജാതി വിഭാഗത്തില്‍ പെടുന്നയാള്‍ തന്നെയാണെന്നും ജില്ലാ കലക്ടര്‍ അടക്കമുള്ളവരുടെ റിപ്പോര്‍ട്ടില്‍ ഇക്കാര്യം വ്യക്തമാണെന്നും പുനിയ പറഞ്ഞു.

ഇപ്പോഴത്തെ സംഭവങ്ങള്‍ ദൗര്‍ഭാഗ്യകരവും സങ്കടകരവുമാണെന്ന് അദ്ദേഹം സൂചിപ്പിച്ചു. രോഹിതിനെ ദലിതനല്ലാതാക്കാന്‍ ബോധപൂര്‍വമായ ശ്രമങ്ങള്‍ നടന്നുവരികയാണെന്നും അദ്ദേഹം പറഞ്ഞു. രോഹിത് ദലിതനല്ലെന്ന വാദം ബി.ജെപിക്കാര്‍ പ്രചരിപ്പിക്കുന്ന പച്ചക്കള്ളമാണ്. ഈ നുണ സ്ഥാപിക്കാന്‍ വേണ്ടിയാണ് രൂപന്‍വാള്‍ കമ്മിഷന്‍ ഉണ്ടാക്കിയതെന്നും പുനിയ കുറ്റപ്പെടുത്തി.