ഉംറ ഹ്രസ്വ പഠനം' പുസ്തകം പാണക്കാട് സയ്യിദ് ഹമീദലി ശിഹാബ് തങ്ങള്‍ പ്രകാശനം ചെയ്തു

ദുബൈ: ഉംറ ചെയ്യുന്നവര്‍ക്ക് വഴികാട്ടിയായി രചിച്ച 'ഉംറ ഹ്രസ്വ പഠനം' എന്ന പുസ്തകം ദുബൈയില്‍ പ്രകാശനം ചെയ്തു. എസ്.കെ.എസ്.എസ്.എഫ് സംസ്ഥാന അധ്യക്ഷന്‍ പാണക്കാട് സയ്യിദ് ഹമീദലി ശിഹാബ് തങ്ങള്‍ എസ്.കെ.എസ്.എസ്.എഫ് യു.എ.ഇ കമ്മറ്റി പ്രസിഡണ്ട് ശുഐബ് തങ്ങള്‍ക്ക് നല്‍കി പ്രകാശനം ചെയ്തു. സമസ്ത മലപ്പുറം ജില്ല മുശാവറ അംഗം മുഹമ്മദ് സലീം ദാരിമി ചെറള രചിച്ച പുസ്തകം ജലീല്‍ ഹാജി ഒറ്റപ്പാലമാണ് പ്രസിദ്ധീകരിച്ചത്.

ചടങ്ങില്‍ ജലീല്‍ ഹാജി ഒറ്റപ്പാലം, റസാഖ് വളാഞ്ചേരി, ശൗക്കത്തലി ഹുദവി, അസീല്‍ അലി ശിഹാബ് തങ്ങള്‍ പാണക്കാട്, യാമീന്‍ അലി ശിഹാബ് തങ്ങള്‍ പാണക്കാട്, ശറഫുദ്ദീന്‍ ഹുദവി, അലി ഫൈസി പാലക്കാട് തുടങ്ങിയവരും എസ്.കെ.എസ്.എസ്.എഫ് യു.എ.ഇ കമ്മറ്റി പ്രതിനിധികളും സംബന്ധിച്ചു.

ഉംറ നിര്‍വഹിക്കാനുദ്ദേശിക്കുന്ന സാധാരണക്കാര്‍ക്ക്് മനസിലാവുന്ന പാദാവലികളും പദപ്രയോഗങ്ങളും ഉപയോഗിച്ച് തയ്യാറാക്കിയ കൈവശം കൊണ്ടു നടക്കാന്‍ കഴിയുന്ന ചെറിയ ഗ്രന്ഥമാണിതെന്നും ആദ്യമായി ഉംറ നിര്‍വഹിക്കാനെത്തുന്നവര്‍ക്ക് പോലും പൂര്‍ണമായും സഹായകമാവുന്നതാണിതെന്നും പ്രസാധനം നിര്‍വഹിച്ച ജലീല്‍ ഹാജി ഒറ്റപ്പാലം പറഞ്ഞു.