വാഹനാപകടത്തില്‍ വിദ്യാര്‍ഥികള്‍ മരിച്ച സംഭവം; ബൈക്ക് വാടകയ്ക്ക് കൊടുത്തയാള്‍ അറസ്റ്റില്‍

മലപ്പുറം: ചുങ്കത്തറയില്‍ ബൈക്കും ചരക്കുജീപ്പും കൂട്ടിയിടിച്ച് ബൈക്ക് യാത്രികരായ രണ്ട് സ്‌കൂള്‍ വിദ്യാര്‍ഥികള്‍ മരിച്ച സംഭവത്തില്‍ ഇവര്‍ക്ക് ബൈക്ക് വാടകയ്ക്ക് കൊടുത്തയാള്‍ അറസ്റ്റില്‍. കോടാലിപെയില്‍ സ്വദേശി മുഹമ്മദ് അജ്‌നാസിനെയാണ് എടക്കര പൊലിസ് അറസ്റ്റ് ചെയ്തത്. ഇയാളുടെ അറസ്റ്റ് രേഖപ്പെടുത്തി ജാമ്യത്തില്‍ വിട്ടു.

ചുങ്കത്തറ മാര്‍ത്തോമാ സ്‌കൂള്‍ വിദ്യാര്‍ഥികളായ യദു കൃഷ്ണന്‍, ഷിബിന്‍രാജ് എന്നിവരാണ് മരിച്ചത്. ഒന്‍പതാംക്ലാസ് വിദ്യാര്‍ഥികളാണ് ഇവര്‍. രാവിലെ ചുങ്കത്തറയിലെ ട്യൂഷന്‍ സെന്ററിലേക്കാണ് കുട്ടികള്‍ പോയത്. സംഭവത്തില്‍ മനപൂര്‍വമല്ലാത്ത നരഹത്യയ്ക്ക് ചരക്കുജീപ്പിന്റെ ഡ്രൈവര്‍ കര്‍ണാടക സ്വദേശിക്കെതിരെ നേരത്തെ പൊലിസ് കേസെടുത്തിരുന്നു.