എന്‍.ഐ.ടി; നാളെ നടക്കുന്ന പരീക്ഷയ്ക്ക് അഡ്മിറ്റ് കാര്‍ഡ് ലഭിച്ചില്ലെന്ന് പരാതി

കോഴിക്കോട്• എന്‍.ഐ.ടിയില്‍ വിവിധ തസ്തികകളിലേക്ക് സ്ഥിരം നിയമനത്തിന് നാളെ മുതല്‍ നടക്കുന്ന പരീക്ഷയ്ക്കു ഇതു വരെ അഡ്മിറ്റ് കാര്‍ഡ് ലഭിച്ചില്ലെന്ന് പരാതി.
ഓഫിസ് അറ്റന്‍ഡന്റ്, ലാബ് അറ്റന്‍ഡന്റ്, ജൂനിയര്‍ അസിസ്റ്റന്റ്, ടെക്‌നീഷ്യന്‍, സീനിയര്‍ അസിസ്റ്റന്റ്, സൂപ്രണ്ട്, സീനിയര്‍ ടെനീഷ്യന്‍ തുടങ്ങിയ തസ്തികകളിലേക്കാണ് നാളെ രാവിലെ 8.30 മുതല്‍ വൈകിട്ട് 7.30 വരെ മൂന്ന് ബാച്ചുകളിലായി നാഷനല്‍ ടെസ്റ്റിങ് ഏജന്‍സി (എന്‍.ടി.എ) നേതൃത്വത്തില്‍ പരീക്ഷ നടത്തുമെന്ന് ഉദ്യോഗാര്‍ഥികളെ അറിയിച്ചത്. കോഴിക്കോട്, തിരുവനന്തപുരം തുടങ്ങിയ നഗരങ്ങളില്‍ പരീക്ഷ കേന്ദ്രങ്ങള്‍ ഉണ്ടെന്ന് അറിയിക്കുകയല്ലാതെ പരീക്ഷ കേന്ദ്രം എവിടെ ആണെന്നോ, റിപ്പോര്‍ട്ട് ചെയ്യേണ്ട രീതിയെ കുറിച്ചോ ഇതു വരെ അധികൃതര്‍ വ്യക്തത നല്‍കാത്തതു ഉദ്യോഗാര്‍ഥികളെ ആശങ്കയിലാക്കിയിട്ടുണ്ട്.

വിവിധ തസ്തികകളിലേക്ക് കഴിഞ്ഞ ജൂലായില്‍ എന്‍.ഐ.ടി നടത്തിയ പരീക്ഷ ഹൈടെക് കോപ്പിയടി നടന്നിട്ടും പൊലിസിന് കൈമാറാതെ അധികൃതര്‍ വൈകിപ്പിച്ചത് വിവാദമായി നിലനില്‍ക്കെ ആണ് ഉദ്യോഗാര്‍ഥികളെ ആശങ്കയിലാക്കി അധികൃതരുടെ ഒളിച്ചുകളി. കാസര്‍കോട് മുതല്‍ തിരുവനന്തപുരം വരെ വിവിധ ജില്ലകളില്‍ നിന്നുള്ള ഉദ്യോഗാര്‍ഥികളാണ് ഓരോ പരീക്ഷയ്ക്കും 1,000 രൂപ വീതം ഫീസ് അടച്ച് അപേക്ഷ നല്‍കിയത്. കഴിഞ്ഞ മാസം പരീക്ഷ നടത്തിയ പല തസ്തികകളിലും നിയമന നടപടികള്‍ പൂര്‍ത്തിയാക്കിയിട്ടില്ല.