ലക്‌നൗ • കോൺഗ്രസ് പ്രസിഡന്റ് തെരഞ്ഞെടുപ്പിൽ ഗാന്ധി കുടുംബത്തിന്റെ പിന്തുണയുള്ള ഔദ്യോഗിക സ്ഥാനാർഥിയാണ് താനെന്ന റിപ്പോർട്ടുകൾ തള്ളി മല്ലികാർജുൻ ഖാർഗെ. പ്രസിഡന്റ് സ്ഥാനത്തേക്ക് ഒരിക്കലും ഇടക്കാല അധ്യക്ഷ സോണിയ ഗാന്ധി തന്നെ നിർദേശിച്ചിട്ടില്ല. താനൊരിക്കലും അങ്ങനെ പറഞ്ഞിട്ടില്ലെന്നും ഖാർഗെ വ്യക്തമാക്കി. സോണിയ വിളിച്ചുവരുത്തി പാർട്ടിയെ നയിക്കാൻ ഖാർഗെയോട് ആവശ്യപ്പെട്ടതായ റിപ്പോർട്ടുകൾ പുറത്തുവന്നതിന് പിന്നാലെയാണ് അദ്ദേഹത്തിന്റെ വിശദീകരണം.
''അധ്യക്ഷ സ്ഥാനത്തേക്ക് സോണിയ ഗാന്ധി എന്റെ പേര് നിർദേശിച്ചെന്നത് ഊഹാപോഹങ്ങളാണ്. ഞാൻ ഒരിക്കലും അങ്ങനെ പറഞ്ഞിട്ടില്ല. ഗാന്ധി കുടുംബത്തിൽ നിന്ന് ആരും മത്സരിക്കാനില്ലെന്നും ഒരു സ്ഥാനാർഥിയെയും പിന്തുണയ്ക്കില്ലെന്നും ആ കുടുംബം അറിയിച്ചതാണ്. കോൺഗ്രസിനും സോണിയക്കും എനിക്കുമെതിരേ ചിലർ ഇല്ലാക്കഥകൾ പ്രചരിപ്പിക്കുകയാണ്.

രാജ്യത്തെ സ്ഥിതി മോശമായതിനാൽ എനിക്ക് പോരാടാൻ ആഗ്രഹമുണ്ട്. സി.ബി.ഐ, ഇ.ഡി, എൻ.ഐ.എ പോലുള്ള കേന്ദ്ര അന്വേഷണ ഏജൻസികളുടെ വിശ്വാസ്യത ഇല്ലാതാക്കുകയാണ്. കേന്ദ്രസർക്കാരിന്റെ ഇത്തരം നടപടികൾക്കെതിരായ പോരാട്ടത്തിന് നേതൃത്വം നൽകാൻ അധികാരം ആവശ്യമാണ്. അതുകൊണ്ടാണ് നിരവധി പ്രതിനിധികളുടെ ശുപാർശ പ്രകാരം മുതിർന്ന നേതാവ് എന്നനിലയ്ക്ക് തെരഞ്ഞെടുപ്പിൽ മത്സരിക്കുന്നത്. തെരഞ്ഞെുപ്പ് പ്രക്രിയ തുടങ്ങിയ ശേഷം സോണിയയെ കണ്ടിട്ടില്ല''. ഖാർഗെ വിശദീകരിച്ചു.