കൊച്ചി: പെരുമ്പാവൂര്‍ എം.എല്‍.എ എല്‍ദോസ് കുന്നപ്പിള്ളിയെ കാണ്‍മാനില്ലെന്നു ചൂണ്ടിക്കാട്ടി മിസ്സിങ് കേസ് നല്‍കി ഡി.വൈ.എഫ്.ഐ. പെരുമ്പാവൂര്‍ ബ്ലോക്ക് ഡി.വൈ.എഫ്.ഐ പ്രസിഡന്റ് പി.എ അഷ്‌കറാണ് പൊലിസില്‍ പരാതി നല്‍കിയത്.

എം.എല്‍.എ ഓഫിസ് അടച്ചിട്ടിരിക്കുകയാണ്. ഫോണും സ്വിച്ച് ഓഫാണ്. അതിനാല്‍ താനുള്‍പ്പെടെ മണ്ഡലത്തിലുള്ള പൊതുജനങ്ങള്‍ക്ക് എം.എല്‍.എയുമായി ബന്ധപ്പെട്ട് നടത്തേണ്ട ആവശ്യങ്ങള്‍ സാധിക്കുന്നില്ലെന്നും എം.എല്‍.എയെ കണ്ടെത്തി നല്‍കണമെന്നുമാണ് പരാതിയില്‍ പറയുന്നത്.

സ്വാഭാവിക നടപടിയായി പൊലിസ് പരാതി സ്വീകരിച്ച് കൈപ്പറ്റ് രസീതും നല്‍കി.

'പൊതുജനങ്ങള്‍ ആശ്രയിക്കുന്ന എം.എല്‍.എ ഓഫിസ് അടച്ചിട്ട നിലയിലും എം.എല്‍.എയുടെ 9446300547 എന്ന നമ്പര്‍ സ്വിച്ച് ഓഫ് ചെയ്ത നിലയിലുമാണ്. മണ്ഡലത്തിലെ വോട്ടറും സ്ഥിരം താമസക്കാരന്‍ എന്ന നിലയില്‍ എനിക്കും അദ്ദേഹത്തിന്റെ പാര്‍ട്ടി നേതാക്കള്‍ക്കും മണ്ഡലത്തിലെ മറ്റു പൊതുജനങ്ങള്‍ക്കും എം.എല്‍.എയുമായി ബന്ധപ്പെടേണ്ട ആവശ്യങ്ങള്‍ക്ക് അദ്ദേഹത്തെ കണ്ടെത്താന്‍ കഴിയാത്ത നിലയാണ്. ആയതിനാല്‍ പെരുമ്പാവൂര്‍ എം.എല്‍.എ എല്‍ദോസ് പി.കുന്നപ്പിള്ളിയെ കണ്ടെത്തി നല്‍കണമെന്ന് അഭ്യര്‍ഥിക്കുന്നു' പരാതിയില്‍ പറയുന്നു.