തിരുവനന്തപുരം: വാഹാനപകടത്തില്‍ വാവാ സുരേഷിന് ഗുരുതര പരുക്ക്. കാറും കെഎസ്ആര്‍ടിസി ബസും കൂട്ടിയിടിച്ചാണ് അപകടം. തിരുവനന്തപുരം കിളിമാനൂരിന് അടുത്ത് തട്ടത്ത് മലയില്‍ വച്ചായിരുന്നു അപകടം. വാവാ സുരേഷിന് മുന്നില്‍ പോയ മറ്റൊരു കാര്‍ നിയന്ത്രണം തെറ്റി റോഡരികിലെ ഭിത്തിയില്‍ ഇടിക്കുകയും പിന്നില്‍ വാവാ സഞ്ചരിച്ചിരുന്ന ടാക്‌സി കാറിലേക്ക് ഇടിച്ച് കയറുകയുമായിരുന്നു. അപകടത്തില്‍ ദിശ മാറി സഞ്ചരിച്ച വാവാ സുരേഷിന്റെ കാറിലേക്ക് എതിര്‍ ദിശയില്‍ നിന്നും വന്ന കെഎസ്ആര്‍ടിസി ബസ് ഇടിച്ചു. ബസിനടിയിലേക്ക് ഇടിച്ചു കയറിയാണ് കാര്‍ നിന്നത്.

രാവിലെ പതിനൊന്ന് മണിയോടെയായിരുന്നു അപകടം. വാവാ സുരേഷിനേയും കാറിന്റെ ഡ്രൈവറേയും നാട്ടുകാര്‍ ചേര്‍ന്ന് മറ്റൊരു വാഹനത്തില്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചു.മുഖത്തിന് സാരമായ പരിക്കേറ്റ വാവ ഇപ്പോള്‍ ഐസിയുവില്‍ നിരീക്ഷണത്തിലാണെങ്കിലും ആശങ്കപ്പെടേണ്ട സാഹചര്യമില്ലെന്നും ഡോക്ടര്‍മാര്‍ അറിയിച്ചു