മെറ്റയുടെ ഉടമസ്ഥതയിലുള്ള സാമൂഹ്യ മാധ്യമമായ വാട്സ്ആപ്പ് പ്രവര്‍ത്തനരഹിതമായെന്ന് റിപ്പോര്‍ട്ട്. ഇന്ത്യ ഉള്‍പ്പെടെയുള്ള നിരവധി രാജ്യങ്ങളില്‍ പ്രശ്നം റിപ്പോര്‍ട്ട് ചെയ്തിരുന്നു. സാങ്കേതിക തകരാറോണോ എന്ന കാര്യത്തില്‍ കമ്പനിയുടെ ഭാഗത്തു നിന്ന് ഔദ്യോഗിക വിശദീകരണങ്ങള്‍ ഇതുവരെ ലഭിച്ചിട്ടില്ലെങ്കിലും ലോകത്തിന്റെ പല ഭാഗങ്ങളിലും മെസ്സേജിങ് ആപ്ലിക്കേഷന്‍ വഴി സന്ദേശങ്ങള്‍ അയയ്ക്കാനോ സ്വീകരിക്കാനോ കഴിഞ്ഞിരുന്നില്ല. ഇതിന് മുമ്പും പലതവണ ഇന്ത്യയില്‍ വാട്സ്ആപ്പ് പ്രവര്‍ത്തന രഹിതമായിട്ടുണ്ട്.

ഉച്ചക്ക് 12.30 ഓടെ നിശ്ചലാവസ്ഥയിലായ വാട്‌സ്ആപ്പ് രണ്ടരയോടെ പൂര്‍വ്വസ്ഥിതിയിലായി. എന്താണ് സംഭവിച്ചതെന്ന് മെറ്റ വിശദീകരിച്ചിട്ടില്ല. വാട്സ്ആപ്പ് പ്രവര്‍ത്തനരഹിതമായതോടെ ട്വിറ്ററില്‍ ട്രോളുകള്‍ നിറഞ്ഞു. മെറ്റ സിഇഒ മാര്‍ക്ക് സക്കര്‍ബര്‍ഗിന്റെ ചിത്രങ്ങള്‍ വച്ചാണ് മിക്ക ട്രോളുകളും. വാട്സ്ആപ്പ് ഡൗണ്‍ എന്ന ഹാഷ്ടാഗ് ട്വിറ്ററില്‍ ട്രെന്‍ഡിങ്ങാണ്.