ന്യൂഡല്‍ഹി: ഇന്ന് തനിക്കേറെ ആശ്വാസം തോന്നുന്നുവെന്ന് കോണ്‍ഗ്രസ് മുന്‍ അധ്യക്ഷ സോണിയാ ഗാന്ധി. കഴിഞ്ഞ് 23 വര്‍ഷമായി വഹിക്കുന്ന പാര്‍ട്ടി അധ്യക്ഷ ചുമതല മല്ലകാര്‍ജ്ജുന്‍ ഖാര്‍ഗെയ്ക്ക് കൈമാറിയ ശേഷം നടത്തിയ പ്രസംഗത്തിലാണ് അവരുടെ പ്രതികരണം.

'എന്റെ കടമ ഞാന്‍ എന്റെ കഴിവിന്റെ പരമാവധി നിറവേറ്റി. ഇന്ന് ഞാന്‍ വലിയൊരു ഉത്തരവാദിത്വത്തില്‍ നിന്ന് സ്വതന്ത്രയായിരിക്കുകയാണ്. വലിയ ഒരു ഭാരം എന്റെ ചുമലില്‍ നിന്ന് ഇറക്കി വെച്ചിരിക്കുന്നു. എനിക്ക് വല്ലാത്ത ആശ്വാസം അനുഭവപ്പെടുന്നുണ്ട്' ആവേശഭരിതരായ അണികളെ സാക്ഷി നിര്‍ത്തി അവര്‍ പറഞ്ഞു.

ഇത് വലിയൊരു ഉത്തരവാദിത്വമായിരുന്നു. ഈ ഉത്തരവാദിത്വം ഇനി ഖാര്‍ഗെയ്ക്കാണ്- അവര്‍ പറഞ്ഞു. രാജ്യത്തെ ജനാധിപത്യ മൂല്യങ്ങളെ സംരക്ഷിക്കുക എന്നതാണ് ഇന്ന് നേരിടുന്ന ഏറ്റവും വലിയ വെല്ലുവിളിയെന്നും അവര്‍ കൂട്ടിച്ചേര്‍ത്തു.

'കോണ്‍ഗ്രസ് നിരവധി വെല്ലുവിളികളെയാണ് നേരിടുന്നത്. നമ്മള്‍ എങ്ങിനെയാണ് അതിനെ നേരിടേണ്ടത്. മുഴുവന്‍ ശക്തിയോടെ ഐക്യത്തോടെ നാം മുന്നോട്ടുവരണം. വിജയിക്കണം- അവര്‍ പറഞ്ഞു.

ഇന്ന് രാവിലെയാണ് മല്ലികാര്‍ജുന്‍ ഖാര്‍ഗെ കോണ്‍ഗ്രസ് അധ്യക്ഷനായി ചുമതലയേറ്റത്. എ.ഐ.സി.സി ആസ്ഥാനത്ത് നടന്ന ചടങ്ങില്‍ സോണിയ ഗാന്ധിക്ക് പുറമെ, മുന്‍ അധ്യക്ഷന്‍ രാഹുല്‍ ഗാന്ധി, പ്രിയങ്ക ഗാന്ധി, പി.സി.സി അധ്യക്ഷന്‍മാര്‍, മുതിര്‍ന്ന നേതാക്കന്മാര്‍ അടക്കമുള്ളവര്‍ പങ്കെടുത്തിരുന്നു.

24 വര്‍ഷത്തിന് ശേഷം നെഹ്‌റു കുടുംബത്തിന് പുറത്ത് നിന്ന് എത്തുന്ന കോണ്‍ഗ്രസ് അധ്യക്ഷനാണ് മല്ലികാര്‍ജുന്‍ ഖാര്‍ഗെ. ദലിത് വിഭാഗത്തില്‍ നിന്ന് അര നൂറ്റാണ്ടിന് ശേഷം അധ്യക്ഷനാകുന്ന നേതാവ് എന്ന പ്രത്യേകതയും ഖാര്‍ഗെയ്ക്കുണ്ട്.

ശശി തരൂര്‍ ആയിരുന്നു അധ്യക്ഷ സ്ഥാനത്തേക്ക് ഖാര്‍ഗെയുടെ എതിരാളി. ഔദ്യോഗിക സ്ഥാനാര്‍ത്ഥി ഇല്ലെന്ന് സോണിയാ ഗാന്ധി പറഞ്ഞിരുന്നെങ്കിലും ഗാന്ധി കുടുംബത്തിന്റെ ആശിര്‍വാദത്തോടെയാണ് ഖാര്‍ഗെ മത്സരിക്കുന്നതെന്നായിരുന്നു രാഷ്ട്രീയ നിരീക്ഷകരുടെ വിലയിരുത്തല്‍. ഗാന്ധി കുടംബത്തിന്റെ പ്രതിനിധിയായിട്ടാണ് ഖാര്‍ഗെ കോണ്‍ഗ്രസിനെ നയിക്കുകയെന്നും വിമര്‍ശകര്‍ ചൂണ്ടിക്കാട്ടി. എന്നാല്‍ കോണ്‍ഗ്രസ് നേതൃത്വം ഇതെല്ലാം നിഷേധിച്ചു. പാര്‍ട്ടിക്കുള്ളിലെ ജനാധിപത്യത്തിന്റെ തെളിവായിരുന്നു ഈ തെരഞ്ഞെടുപ്പെന്നും നേതൃത്വം വ്യക്തമാക്കുന്നു.