ന്യൂഡല്‍ഹി: രാജ്യത്തെ വിവിധ പൊലിസ് സേനകള്‍ക്ക് ഒരേ തരത്തിലുള്ള യൂനിഫോം കൊണ്ടുവരുന്നതിനെ ക്കുറിച്ച് ആലോചിക്കണമെന്ന് പ്രധാനമന്ത്രി നരേന്ദ്ര മോദി. ഒരു രാഷ്ട്രം, ഒരു യൂനിഫോം എന്ന ആശയം ജനങ്ങളുടെ മുന്നില്‍ വയ്ക്കുകയാണെന്നും തീരുമാനം അടിച്ചേല്‍പ്പിക്കാന്‍ ഉദ്ദേശിക്കുന്നില്ലെന്നും അദ്ദേഹം പറഞ്ഞു.

ഇത് ഒരു ആശയം മാത്രമാണ്. ജനങ്ങളുടെ മുന്നില്‍ ചര്‍ച്ചയ്ക്ക് സമര്‍പ്പിക്കുന്നു. ചിലപ്പോള്‍ നടപ്പായേക്കാം. ഒരു പക്ഷേ അമ്പതോ നൂറോ വര്‍ഷം എടുത്തേക്കാം. എങ്കിലും ചര്‍ച്ച ചെയ്യേണ്ട വിഷയമാണ് എന്നായിരുന്നു പ്രധാനമന്ത്രിയുടെ വാക്കുകള്‍. സംസ്ഥാനങ്ങളിലെ ആഭ്യന്തര മന്ത്രിമാരുടെ 'ചിന്തന്‍ ശിവിര്‍' സമ്മേളനത്തിലാണ് മോദി ഈ ആശയം മുന്നോട്ടുവച്ചത്.

വിവിധ സംസ്ഥാനങ്ങളിലെ പൊലിസ് സേനകള്‍ക്കെല്ലാം ഒരേ തരത്തിലുള്ള യൂനിഫോം കൊണ്ടുവരുന്നത് ഒരേ ഐഡന്റിറ്റി നല്‍കാന്‍ സഹായിക്കും. കുറ്റകൃത്യങ്ങള്‍ തടയുന്നതിനും പ്രതികളെ പിടികൂടുന്നതിനും സംസ്ഥാന പൊലിസ് സേനകള്‍ പരസ്പര സഹകരണത്തോടെ പ്രവര്‍ത്തിക്കണം. ക്രമസമാധാനപാലനത്തില്‍ സംസ്ഥാനങ്ങളില്‍ ഏകീകൃത നിയമങ്ങള്‍ വേണമെന്ന ആഭ്യന്തര മന്ത്രി അമിത് ഷായുടെ നിര്‍ദേശത്തെയും പ്രധാനമന്ത്രി പിന്തുണച്ചു. ഫെഡറല്‍ ആശയങ്ങളോടുള്ള സഹകരണമെന്നത് ഭരണഘടനയുടെ താല്‍പര്യം മാത്രമല്ലെന്നും കേന്ദ്രത്തിന്റെയും സംസ്ഥാനങ്ങളുടെയും ഉത്തരവാദിത്തമാണെന്നും മോദി അഭിപ്രായപ്പെട്ടു. ക്രമസമാധാനം ഭരണഘടനാ തത്വങ്ങള്‍ പ്രകാരം സംസ്ഥാനങ്ങളുടെ ഉത്തരവാദിത്തമാണെങ്കിലും രാജ്യത്തിന്റെ ഐക്യവും അഖണ്ഡതയുമായി അത് ബന്ധപ്പെട്ടിരിക്കുന്നുവെന്നും പ്രധാനമന്ത്രി പറഞ്ഞു.

ആഭ്യന്തര സുരക്ഷയ്ക്ക് വേണ്ടി സംസ്ഥാനങ്ങള്‍ ഒത്തൊരുമിച്ച് പ്രവര്‍ത്തിക്കേണ്ടതുണ്ട്. കേന്ദ്ര ഏജന്‍സികളും സംസ്ഥാന സേനകളും യോജിച്ച് പ്രവര്‍ത്തിക്കണം. രാഷ്ട്രത്തോടുള്ള ഉത്തരവാദിത്തമാണത്. പുതിയ കാലത്തെ വെല്ലുവിളികള്‍ നേരിടുന്നതിന് സംസ്ഥാനങ്ങള്‍ പഴയ നിയമങ്ങളില്‍ കാലോചിതമായ പരിഷ്‌കരണങ്ങള്‍ കൊണ്ടുവരണം.

തെറ്റായ കാര്യങ്ങള്‍ പ്രചരിക്കുന്നത് തടയാന്‍ നടപടി വേണം. ഇക്കാര്യത്തില്‍ സാങ്കേതികവിദ്യക്ക് പ്രധാന പങ്കുവഹിക്കാനുണ്ട്. ഫോര്‍വേഡ് ചെയ്യുന്നതിനു മുമ്പ് ഇവ ശരിയാണോയെന്ന് ജനങ്ങള്‍ക്ക് പരിശോധിക്കാന്‍ സാധിക്കുന്ന സംവിധാനങ്ങള്‍ ആവശ്യമാണ്. ഇന്റലിജന്‍സ് വിഭാഗങ്ങള്‍ പരസ്പര സഹകരണത്തോടെ പ്രവര്‍ത്തിച്ചാല്‍ മെച്ചപ്പെട്ട ഫലമുണ്ടാക്കാനാവും. സാങ്കേതികവിദ്യക്ക് തുക വകയിരുത്തുമ്പോള്‍ സംസ്ഥാനങ്ങള്‍ ബഡ്ജറ്റ് പരിമിതികള്‍ നോക്കരുത്. സാങ്കേതികരംഗത്തെ ഇന്നത്തെ നിക്ഷേപം ഭാവിയിലെ കരുതല്‍ നിക്ഷേപമാണെന്നും പ്രധാനമന്ത്രി അഭിപ്രായപ്പെട്ടു.