ദുബൈ: നടുറോഡില്‍ വാഹനം ബ്രേക്ക് ഡൗണായാല്‍ എന്തു ചെയ്യണമെന്ന നിര്‍ദേശവുമായി അബൂദബി പൊലിസ്. വീഡിയോ സന്ദേശമാണ് അബൂദബി പൊലിസ് പുറത്തു വിട്ടത്. പ്രത്യേകിച്ചും രാത്രി സമയങ്ങളില്‍ റോഡില്‍ വാഹനം നിര്‍ത്തുന്നതിലെ അപകട സാധ്യത ഡ്രൈവര്‍മാര്‍ മനസിലാക്കണമെന്ന് പൊലിസ് പറയുന്നു. സുരക്ഷാ മാര്‍ഗനിര്‍ദേശങ്ങള്‍ പാലിക്കാതിരിക്കുന്നത് 500 ദിര്‍ഹം പിഴ ലഭിക്കാവുന്ന കുറ്റമാണ്. വാഹനം നടുറോഡില്‍ വെച്ച് പെട്ടെന്ന് തകരാറിലായാല്‍ ഡ്രൈവര്‍മാര്‍ ചെയ്യേണ്ട ആറ് കാര്യങ്ങള്‍ ഇവയാണ്. 1. വാഹനം റോഡില്‍ നിന്ന് പ്രത്യേക എമര്‍ജന്‍സി ഏരിയകളിലേക്ക് മാറ്റണം. 2. റോഡിന്റെ വലതു വശത്തുള്ള ഷോള്‍ഡറും ഈ സമയത്ത് ഉപയോഗിക്കാവുന്നതാണ്. 3. ഹസാര്‍ഡ് ലൈറ്റുകള്‍ ഓണ്‍ ചെയ്യണം 4. പിന്നില്‍ നിന്ന് വരുന്ന വാഹനങ്ങളിലെ ഡ്രൈവര്‍മാര്‍ക്ക് മുന്നറിയിപ്പ് നല്‍കാനായി വാഹനത്തിലെ റിഫ്‌ളക്ടീവ് ട്രയാങ്കിള്‍ റോഡില്‍ വെക്കണം. തകരാറിലായ വാഹനത്തിന്റെ പിന്നിലായി ഏകദേശം അറുപത് മീറ്റര്‍ അകലെയാണ് ഇത് വെക്കേണ്ടത്. 5. നിങ്ങളുടെ സുരക്ഷ ഉറപ്പുവരുത്താനായി എത്രയും വേഗം വാഹനത്തില്‍ നിന്ന് പുറത്തിറങ്ങി സുരക്ഷിത സ്ഥലത്തേക്ക് മാറി നില്‍ക്കണം. 6. എമര്‍ജന്‍സി ഹോട്ട്‌ലൈനായ 999 എന്ന നമ്പറില്‍ വിളിച്ച് സഹായം തേടണം.